Juvel II í Føroyum - spennandi vitjanir!
Ætlaða missiónsferðin til Grønlands í summar við Juvel II bleiv av ongum orsaka Korona, og almenna missiónsferðin í Føroyum við Atlantic Mission, sum varð kunngjørd at vera við Juvel II í vár, varð eisini avlýst vegna Korona. Men hóast hetta so hevur Juvel II verið at sæð kring oyggjarnar í summar í misssiónsørindum.
Seinnapartin í juli vitjaði skipið í Norðoyggjum, har møtir vórðu hildin í Hattarvík, Svínoy, Viðareiði og Norðdepli. Í Svínoy og Fugloy varð tó ikki lagt til bryggju, men mobbáturin varð brúktur millum skipið og land. Mobbáturin verður eisini nógv brúktur í Grønlandi júst til sama endamál.
Seinasta vikuskifti í august mánaða vitjaði Juvel í Sundalagnum og í Vágunum. Skipið legði til bryggju í Hósvík, Miðvági og á Eiði. Møtir vóru hildin bæði úttandura og innandura, eisini varð bjóðað til barnamøtir. Vitjað varð í húsini við traktatum.
Fyrst í september vitjaði skipið í Suðuroy. Skipið lá til bryggju á Tvøroyri og í Vági. Manningin ferðaðist runt oynna til møtir; m.a. var lýst til møti í stóru hølunum í Salt á Drelnesi, har væl av fólki møtti upp.
Miðskeiðis í september var juvel II á vitjan runt Skálafjørðin. Byrjað var á Strondum, síðani var farið inn á Skála, og har frá yvir á Søldarfjørð, og síðani var farið út í Runavíkina, har ferðin endaði sunnukvøldið, har lýst var til evangeliskt møti í Berøa.
Skipari á øllum ferðunum var Gullak Gulaksen. Manningarnar eru væl nøgdar og siga, at væl av fólki vitjaði møtini og at veðrið var til vildar bæði á sjógvi og landi. Í fleiri av støðunum varð eisini vitjað á ellisheimum.
Kristiliga Tíðindatænastan
v/poul jóhan djurhuus
gjaranes@gmail.com
Tlf: +298 228314
Mest lisið í farnu viku
Samband
Heygsvegur 8
490 Strendur