Sløkkiliðini í Suðuroynni fingið stigabil til royndarkoyringar

Stigabilurin, ið sløkkiliðini hava í umbúna at keypa, er gamli stigabilurin hjá Tórshavnar Sløkkiliði, sum er útskiftur orsakað av at hann ikki røkkur nýggju høgu bygningarnar í Havn.

Anfinn H. Leo og Gudmundur Jacobsen átaksleiðarar eru samdur um, at her er talan um ein stigabil, sum nøktar tørvin fyri alla Suðuroynna, og at bilurin er í sera góðum standi, hóast at hann er 20 ára gamal.

Teir siga, at bilurin hevur júst verið til sýn, og har var alt sum tað skuldi vera. Sløkkiliðsútgerðin á bilunum, -tað verið seg serliga stigin-, sum røkkur 30. metur krevur eitt serligt eftirlit, nú hesin er 20 ár. Tí verður neyðugt at senda bilin til Danmarkar komandi ár, har øll útgerðin verður kannað og dagførd á góðkendari verksmiðju, ið er umboð fyri veitarin, ið hevur framleitt stigan á bilinum.

Átaksleiðararnir meta, at hesin stigabilurin nøktar tørvin í Suðuroynni í nógv ár framyvir, og hesin kann beinanvegin verða virkin partur av tilbúgvingini í allari Suðuroynni, og harvið vera við til at økja um trygdina, sum váðametingin og tilbúgvingarætlanin fyri Suðuroynna leggur upp til.