Nú hava fjølmiðlar síðan tíðliga í vár sprænt panikkporno um Corona út um allan heimin. Í fátækum londum, har fólk eru fávitskut og klár at trúgva hvørjum orði, sum tey serkønu snakka fólk í øðrviti av, taka mong óráð fyri.

Eitt av hesum londum er Iran, sum tíðliga varð hart rakt av Wuhan virusi. Iran er strangt shia-muslimskt, har alkohol er strangliga bannað. Fólk kenna ikki alkohol á egnum kroppi, men hava lætt at trúgva, tað kann fyribyrgja og lekja.

Leysatíðindi fóru tíðliga at ganga, at alkohol fyribyrgir krúnukrími. Eitt nú skuldi ein bretskur lærari hava sagt, at hann hevði verið í Wuhan, tá virusin fór at herja, og at hann hevði sjussað seg burtur úr sjúkuni við heitum toddy.

Sum í so mongum londum verður alkohol, rúsdrekka og spritt distillerað í tí muslimska Iran. Heimabryggj fer fram av ymsum spritti, eisini tí, ið nevnist ‘metanol’, sum vanliga verður brúkt til kemiskar blandingar, frystiløg o.t.

Prestastýrið hevur lógarfest, at fyritøkur, ið framleiða metanol, skulu blanda litevni uppí fyri at skilja tað frá etanoli, ið er drekkandi, so fólk á litinum, um tey drekka móti forboði, halda seg frá metanoli, sum er lívshættisligt spritt.

Heimabryggjarar vita, at teir kunnu fáa hetta litevni úr metanoli við at blanda bleikievni uppí. Men teir vita uttan iva eisini, at teir tá spæla við eld.

Eisini føroyingar vita av beiskum royndum frá forboðstíðini, kanska mest undir krígnum, tá rekatunnur við træspritti róku á land frá søktum skipum, at fólk verða sjúk, blind og enntá doyggja, um tey drekka træspritt.

So ræddir blivu iranar fyrst í Coronatíðini, at fólk vágaðu at drekka rúsløg, eisini spritt fyri at brynja síni andevni móti krúnukrími. Ja, foreldur góvu enntá børnum sínum spritt at drekka, til tíðir eisini vanlukku træspritt.

Úrslitið var, at iranar í 100-tali, t.m. børn, doyðu av træspritti. 1000-tals iranar, ið sluppu undan at doyggja av hesum metanoli, træspritti, blívu blind og sjúk.