EG VIL RÆTTAÐ TANN MANGLANDI VINNUPOLITIKKIN Í TÓRSHAVNAR KOMMUNU
Vinnufyritøkur skulu hava munandi betur umstøður at virka undir í Tórshavnar kommunu.
Í Tórshavnar kommunu eru í alt umleið 1.300 vinnufeløg, sum eru skrásett sum antin P/F ella Sp/f. Talan er um feløg í fjølbroyttum vinnugreinum og í øllum støddum. Frá smærri fyritøkum við 1-5 starvsfólkum til stór arbeiðspláss við 4-500 starvsfólkum. Allar hesar fyritøkur hava ómetaliga nógv at týða fyri Tórshavnar kommunu og ikki minst fyri starvsfólkini, sum starvast í privatu vinnuni í kommununi.
Skattainntøkurnar frá hesum fyritøkum hava alstóran týdning fyri inntøkugrundarlagið hjá Tórshavnar kommunu og fíggjar stóran part av rakstri og íløgum í kommununi.
Tí skuldu vit trúð at Tòrshavnar kommuna gjørdi alt fyri, at framtíðartryggja og betra um karmarnar hjá vinnufyritøkum í kommununi.
Tíverri má staðfestast at tað síðstu nógvu árini er gjørt alt ov lítið fyri at tryggja trivnaðin og vakstrarmøguleikar hjá vinnufyritøkum í Tòrshavnar kommunu. Her verður serliga hugsa um miðalstórar og stórar fyritøkur í kommununi, sum serliga hava tørv á vinnugrundstykkjum. Tó er nógv gott gjørt fyri íverksetarafyritøkur í kommununi síðstu árini, sum kunnu gerðast framtíðar vakstrarfyritøkur.
Eg haldi at Tórshavnar kommuna eigur at orða ein nýggjan vinnupolitik, sum veruliga tekur støði í framtíðar tørvinum hjá vinnufyritøkum í kommununi, kanska enntá næstu 20-30 árini.
Mítt greiða ynski til ein nýggjan vinnupolitikk í Tórshavnar kommunu er at hesin sum minstamark eigur at innihalda hesi mál:
- At 50-100 vinnugrundsrykkir eiga at stykkjast út í Havn og í Hoyvík næstu 4 árini.
- At Vestara Bryggja eigur at broytast soleiðis, at fiskivinnufyritøkur fáa enn betur rúmd. Td. eiga gomlu og ótíðarhóskandi Bacalao bygningarnar at verða tiknir niður og eiga vit í staðin at lata vinnuna byggja nýmótans framleiðslubygningar á staðnum til t.d. slóbrótandi góðsking av fiskavørum.
- At parkeringsumstøðurnar í miðbýnum, har handlar eru, eiga at betrast munandi. Hetta kann t.d. gerðast við einum parkeringstunnli ella parkeringshúsið.
Mítt fremsta ynski er, at vinnufyritøkur í Tórshavar kommunu við einum nýggjum og slóbrótandi vinnupolitikki, koma at skapa enn fleiri arbeiðspláss næstu mongu árini og at tær harumframt kunnu skapa enn størri vøkstur, vælferð og trivnað fyri okkara høvuðsstað.
Hetta kemur at gagna okkara vinnufyritøkunum, okkara borgarum og kemur ikki minst at tryggja vaksandi skattainntøkur til Tórshavnar kommunu í framtíðini, okkara kommunu at frama.
Hesum vil eg virka fyri, stuðla tit mær til kommunavalið 10. november.
Gott val
Birgir Nielsen
Valevni fyri lista A til Býráðið
Mest lisið í farnu viku
Samband
Heygsvegur 8
490 Strendur