Bretski parlamentslimurin og fv. ráðharrin, David Davis, hevði herfyri samrøðu við Matt Ridley, blaðmann í náttúru- og heilsumálum hjá Daily Telegraph.

Tað hevur stóran áhuga í Bretlandi, og í øðrum londum, íroknað í Føroyum, sum hesir báðir topparnir á hvør á sínum øki fingu sagt og skrivað.

M.a. hetta: “Eitt náttúruevni er prógvað at vera 100% trygt og neyðugt hjá flestu okkara. Hetta evni hevur í øldir hjálpt fólki ímóti lungna-, æðra- og hjartasjúkum við at styrkja teirra mótstøðuføri, andevni og órin.

Evnið er kliniskt roynt við góðum úrslitum, serliga her norðuri, sum sólin ikki skínur nóg bjart um veturin til, at ljósa húðin hjá okkum ‘norðbúgvum’ kann gera nóg nógvar D-vitaminur úr sólini. Tí mugu vit eta D-vitamin sum ískoyti.”

Tað vóru orðini hjá hesum báðum væl kendu bretum við vanligum viti og skili. Davis og Ridley leggja aftrat í greinini nakað, ið vekir eftirhugsan, nevniliga at:

“D-vitamin er so bílig og til í so ríkiligt mát í t.d. fiskalýsi, at heiliráðsídnaðurin ongan fíggjarliga áhuga hevur í at brúka slíkt náttúruevni til at spara lív ímóti virusálopum á andargøgnini, sum Covid 19 er.” So heldur lata fólk doyggja.

Í Spania eru læknavísindaligar royndir gjørdar í summar við Vitamin-D ískoyti. Tær prógva, at bert 2% av Covid sjúklingum, ið fingu Vitamin-D, tørvaði ICU, móti helvt av sjúklingunum við D-3 troti, ið máttu fáa intensiva viðgerð.

Davis og Ridley fingu læknaliga váttað, at fólk í øllum aldri, ið hava nóg nógv D-3 í sær, hava 25-ferðir minni tørv á intensivari hjálp enn fólk í D-3 troti.

Føroyskir læknar, serfrøðingar í viro- og epidemilogi eru líka ‘klókir’ sum teirra starvsfelagar uttanlands. Teir stappa heldur kemisk eiturevni niður í fólk enn at geva teimum náttúruheilivág, í hesum føri D-3, ið lekir mangt og hvat.

Teir leggja alt samfelagið lamið, sperra fólk í 1000tali inni í sóttarhaldi og legsa búskapin niður við risa pengatapi fyri øll, heldur at at loyva góðum og royndum heilivági uttan hjáárin sum HCQ, Remdesivir o.t.

Tað tænir okkara heilsupávum til lítlan sóma ikki at upplýsa fólk um t.d. Vitamin-D. Føroyingar eru slopnir væl, helst tí vit eta fiskalýsi sum fá onnur. Men kringum er læknalig vanvirðing fyri so einføldum sum D-3 so stór, at heilsupávarnir hava verið atvold til ómetaligan pengamiss og deyðsføll í miljónatal.