Fyrstu pakkarnir farnir umborð
Týskvøldið fór Akraberg av Fuglafirði við kós móti Barentshavinum, har teir hava ein túr eftir í ár. Samstundis fóru fyrstu jólapakkar í ár avstað. Ikki tí, manningin á Akrabergi vónar sjálvsagt at teir vera aftur, áðrenn jólini koma, men tá hetta er síðsti túrur áðrenn jól, ja, so máttu pakkarnir við nú.
Teir tóku eisini pakkar við til Enniberg, sum er til fiskiskap í Barentshavinum. Manningin umborð á Ennibergi vóna eisini, at teir vera heima á jólum, tí hvør vil ikki tað?
Men hóast tað, so eru teirra pakkar nú ávegis upp í Barentshavið. So er bara at vóna, at skipini hittast ella koma at fiska á somu leiðum, so teir umborð á Ennibergi kunnu fáa teirra pakkar.
Gadus fer avstað aftur leygardagin, og teir fáa pakkar umborð, áðrenn fráferð og kanska taka teir eisini pakkar við til Sjúrðarberg.
Komandi vikurnar vera pakkarnir bornir umborð á skipini, og ætlanin er, at tey skip, sum vera úti um jólini, fyrst fáa pakkar.
Hjartans tøkk skal ljóða til kvinnurnar í sjómanskvinnuringunum og onnur, sum lata jólapakkar til okkara siglandi fólk.
Eins og undanfarnu ár, so verður tørvur á umleið 1200 pakkum.
Jólapakkar til sjófólkið kunnu latast inn á fýra støðum:
-Føroya Fiskimannafelag, Bryggjubakki í Havn, Leguhúsið í Nesvík, Blái Krossur Føroya í Saltangará, og Hotel Klaksvík (sjómansheimið).
Tað skrivar Føroyska Sjómansmissiónin á facebook-vanga sínum. Myndir TJ-myndir
Mest lisið í farnu viku
Samband
Heygsvegur 8
490 Strendur