Ukraina er eitt av londunum, sum loyvir vinnuligari kleking av børnum til útflutnings. Í summar hevur stongsul og sóttarhald av Coronu ávum í ES og øðrum londum ført til, at tær 14 fyritøkurnar í Ukraina eru komnar í rasshaft, tí foreldur, ið hava bílagt klekingarbørn, hava ikki sloppið eftir teimum.

Føðistovur og gistingarhús í Ukraina hava tí í vár og summar stríðst við at hava tey 100-tals umbidnu, nýføddu børnini í tryggari varðveitslu, til biologisku og fosturforeldur teirra eru sloppin eftir teimum um landamørk.

Børn bíða vituliga ikki at verða fødd, men koma í heimin sum eftir klokkuni. Ukrainskar ‘klekingarmøður’ hava ikki ræði á børnunum, eftir at tey síggja dagsins ljós. Tá tekur heilsuverkið yvir og ansar børnunum eftir øllum kunstsins reglum, til teirra vónríku foreldur koma eftir teimum.

Hvørja ferð, sóttarhald og stongsul hava verðið innførd aftur eftir ein skáa, so er talið økt á børnum, sum bíða í Ukraina eftir at tey verða heintað.

-Fæst ikki tamarhald á krúnukríminum í heimsins ymsu londum, so foreldur at ‘klaktum’ børnum hava frítt at fara um stongd landamørk, so verður ikki talan um 100-, men 1000-tals børn, ið bíða á gistingarhúsum og klinikkum eftir at verða heintað av teim familjum, sigur Lyudmyla Denisova, ukrainsk umboðskvinna í mannarættindarmálum.

Sum sagt er ‘barnakleking’ ein blómandi  vinna í Ukraina, har serliga 14 fyritøkur skipa fyri kleking av 4.000 børnum til útflutnings. Ein teirra er Bio TexCom, ið sigur seg hava viðskiftafólk í ymsum londum, t.m. USA, Italia, Spania, Bretlandi, Kina, Fraklandi, Rumenia, Eysturríki, Mexico og Portugal, sum í summar hava bíðað í tolni eftir at fáa síni børn.

Eitt ‘klakt’ barn úr Ukraina kostar um 30-40.000 evrur (250.000 kr), ið er helvt bíligari enn slíkt barn í Bretlandi og nógv minni enn í USA. Men ein ukrainsk klekingarmóðir fær bert nakrar fáar túsund krónur í sín part av hesi upphædd og kann bert føða 4 børn sum partur í hesi strangt reluleraðu vinnu í Ukraina.

Ukraina loyvir ikki samkyndum ella støkum lut í eini klekingaravtalu.