Fyrilesturin hjá Svenning av Lofti bar heitið

”Brot úr søgu Ísraels og jødanna 1917-1948.”

Í fyrilestrinum greiddi Svenning frá Balfour-yvirlýsingini, har bretska stjórnin, gevur jødiska heimsfelagsskapinum lyfti um, at Bretland stuðlar ynski jødanna um eitt jødiskt heimland í gamla jødalandi.

Svenning greiddi frá um turkiska heimsveldi, sum fevndi um alt miðeystur og norður í Evropa. Somuleiðis greiddi hann frá teim túsundtals jødunum sum komu til gamla heimland teirra árini 1917-1948 og bæði frammanundan og eftir hetta tíðarskeið.

Í fyrilestrinum varð sagt frá hvussu núverandi kongadømi Jordan varð býtt frá í 1922 til at gerast ogn arabara burturav og at eingin jødi slapp at búseta seg í landaøkinum eystan fyri ánna Jordan, sum var ein partur av upprunaliga stór-ríki jødanna á døgum Dávids og Salomos.

Svenning greiddi eisini frá ymsum politiskum stevnum og fundarvirksemi, ið  vóru um Miðeystur 1917-1948, í samband við sundirbýting av landaøkjum í Miðeystri eftir sigur teirra sameindu á turkiska ríkinum í fyrra heimsbardaga 1914-18. Hesar umrøddu stevnur og fundir vóru:

-Stevnan í San Marinu í Italia
-Hvítabókin hjá Churchill, enskum hjálandaráðharra í 1922 
-Niðurstøðan hjá ensku Peel-nevndini 1937
-Hvitabókin hjá MacDonald, enskum hjálandaráðharra í 1939

Svenning greiddi eisini frá, at felag Sameindu Tjóða býtti gamla jødaland sundur millum arabar og jødar í 1947 – og at arabar ikki góðtóku sítt tillutaða landaøkið, meðan jødar góðkendu landaøkið, ið teimum var tillutað í gamla heimlandi teirra, og stovnaðu ísraelska státin á hesum ST-góðkenda landaøki teirra hin 14. mai 1948.  

Símun Absalonsen hevði fyrilestur um profetiska, søguliga og mentunarliga týdningin í høgtíðum jødanna og Bjørgfinnur Heinesen legði fram søgu Jødanna. 

Leyvsalastevnan í Kelduni varð fyriskipað av føroysku deildini hjá Altjóða Kristiligu Sendistovuni í Jerusalem, (ICEJ). Bjørgfinnur Heinesen er formaður í føroysku deildini. Orsaka avmarkingar vegna korona var luttakatalið avmarkað til 100 fólk.

Kristiliga Tíðindatænastan 
v/poul jóhan djurhuus  
gjaranes@gmail.com