Eg eri sera glaður um, at allir flokkar á Fólkatingi hava gingið ynski mínum á møti og hava játtað at lata Trivnaðar-grunninum fyri sjúklingahotellið 600.000 krónur til ein nýggjan Sóljubuss.

Trivnaðargrunnurin hevur í mong ár gjørt sjálvboðið arbeiði fyri sjúklingar og avvarðandi, sum í longri ella stytri tíð eru í sjúkraørindum í Danmark og búgva á Sjúklingahotellinum Tórshavn í Keypmannahavn.

Trivnaðargrunnurin er mannaður av eldsálum, sum brúka ein stóran part av síni frítíð til at hjálpa og økja um trivnaðin hjá føroyingum, sum eru í einari torførari støðu og langt burturi heimanifrá trygga umhvørvinum í Føroyum.

Hendan tilbúgvingin hevur ómetaliga stórt virði fyri tey, ið búgva á sjúklingahotellinum, og ein partur av hesi tilbúgvingini eru ókeypis útferðir við Sóljubussinum, sum bussurin hjá grunninum eitur, til stóra gleði fyri sjúklingar og avvarðandi, tá gerandisdagurin á sjúklingahotellinum gerst eintáttaður.

Men Sóljubussurin er niðurslitin, og Trivnaðargrunnurin hevur tí leingi ynskt sær, og savnað pening inn til ein nýggjan buss við allari neyðugari útgerð.

Við játtanini hjá Fólkatinginum, afturat teimum 700.000 kr., sum Trivnaðargrunninum sjálvur hevur savnað inn, er nú gjørligt hjá grunninum at keypa ein nýggjan Sóljubuss, ið framyvir eisini kemur at gleða nógvar føroyingar og vónandi lætta um eina tunga støðu.

Les meira her: http://www.saft.fo/Default.aspx?Id=8287 

Tað skrivar Edmund Joensen á facebook-vang sínum