Í Klaksvík tekur KÍ, sum nú er á 2. plássi, ímóti HB í einum av klassisku føroysku fótbóltsuppgerðunum. Tað hevur gingið væl hjá heimaliðnum í seinastuni. KÍ hevur framvegis ikki tapt í Effodeildini, og tríggir teir seinastu dystirnir eru endaðir við sigri.

Heldur trekari hevur verið hjá HB, sum undan dystinum liggur á 5. plássi, seks stig aftanfyri KÍ. Seinast tapti HB móti EB/Streymi, og um menninir hjá Sigfríði Clementsen tapa aftur í dag, eru teir í vanda fyri at missa sambandið við oddin fyribils.

Nummar trý og fýra, Víkingur og TB/FCS/Royn, skulu í hvør sínum lag royna at rætta kósina. Føroyameistararnir hava spælt javnt fýra ferðir á rað, og hava stóran tørv á trimum stigum fyri at hanga í KÍ og NSÍ, sum vísa meistaraform í løtuni.

TB/FCS/Royn er eisini í einum aldudali í løtuni. Tað er ikki tí, at avrikini hava verið vánalig, men suðuroyingarnir hava kortini tapt tríggjar dystir á rað móti ávíkavist NSÍ, HB og KÍ, og uppgávan í Sarpugerði í dag verður neyvan lættari.

B36 tekur ímóti 07 Vestur í Gundadali, har einki annað enn trý stig er nøktandi. Árstalsfelagið hevur spælt heili seks javnleikir higartil og eru tí niðri á 6. plássi við bert níggju stigum. Stóri profilurin, Lukasz Cieslewicz, er farin at venja aftur, og tað eru Philip Lund og Alex Mellemgaard eisini. Kortini er ivasamt, hvussu stóran leiklut teir fáa í dag.

07 Vestur hevur eisini fleiri lyklaspælarar, ið eru ivasamir, og Trygvi Mortensen sigur við in.fo, at hann tekur ongar kjansir við teimum, tí teir skulu vera klárir til lyklauppgerðir móti øðrum liðum í niðara endanum.

Síðsti dysturin hetta umfarið er millum Skála og EB/Streym, sum liggja nummar átta og níggju undan umfarinum. Skála hevur ongan dyst vunnið enn, og fer ivaleyst at leggja nógv fyri at vinna móti kappingarneytunum úr Sundalagnum.

EB/Streymur tók HB á bóli í síðsta umfari, og kemur til Skála við sjálvsáliti. Liðini bæði lata fá mál fara inn, og hagtølini benda á, at talan verður um ein javnan og málfátækan dyst.

Allir dystirnir í dag byrja klokkan 15.00.

9. umfar í Effodeildini:
KÍ-HB
Víkingur-TB/FCS/Royn
B36-07 Vestur
Skála-EB/Streymur