Avgerðandi málið kom beint fyri steðgin, tá Dion Splidt, sum kom til KÍ undan hesum kappingarárinum, skoraði eftir hornasparkskombinatión.

HB royndi at svara aftur í seinna hálvleiki, men tað var ikki fyrrenn síðsta korterið, at teir fingu skapt sær nakrar kjansir. Tað eydnaðist kortini ikki at javna, og tískil er KÍ aftur fremst í Effodeildini, eftir at NSÍ hevði sessin til láns í eitt døgn.

Víkingur hevði trupult við at spæla seg til kjansirnar í fyrra hálvleiki móti stinna felagsliðnum úr Suðuroy, men beint áðrenn hálvleik skoraði Fróði Benjaminsen. Hetta lyfti heimaliðið, og tvingaði TB/FCS/Royn longur fram á vøllin í seinna hálvleiki.

Víkingur fekk eitt sindur meir pláss at spæla á, og teir gjørdu sær dælt av hesum. Andreas Lava Olsen økti stutt eftir steðgin, og Erling Jacobsen staðfesti sigurin, tá hann skoraði til 3-0 fýra minuttir fyri leiklok.

Á Skála var fagnaðurin ovurstórur, eftir at Andras Frederiksberg við máli til 3-2 seint í dystinum, hevði tryggjað heimaliðnum fyrsta sigurin í ár.

Rógvi Egilstoft Nielsen legði annars EB/Streym á odda eftir eitt lítið korter, men Michal Przybylski vendi dystinum við tveimum málum, har serliga útjavnandi langskotsmálið var ein sonn perla.

EB/Streymur gavst kortini ikki á hondum, og javnaði fimm minuttir fyri leiklok við beinleiðis frísparki frá Leif Niclasen. Skála fekk tó síðsta orðið, og tryggjaði sær trý kærkomin stig.

B36 vann sær eisini trý týdningarmikil stig á heimavølli móti 07 Vestur. Talan var um ein tryggan 4-0 sigur. Róaldur Jakobsen skoraði tvey mál fyri árstalsfelagið, og Pætur Petersen og Patrik Johannesen eisini komu á málskjúttalistan.

Úrslitini hava við sær, at KÍ er á odda við 19 stigum, meðan Víkingur er nummar tvey við 17 stigum. NSÍ er á triðja plássi við 16 stigum.

KÍ-HB 1-0 (1-0)
1-0: Dion Splidt 45.

Víkingur-Suðringar 3-0 (1-0)
1-0: Fróði Benjaminsen 42.
2-0: Andreas Lava Olsen 53.
3-0: Erling Jacobsen 86.

Skála-EB/Streymur 3-2 (1-1)
0-1: Rógvi Egilstoft Nielsen 14.
1-1: Michal Przybylski 32.
2-1: Michal Przybylski 63.
2-2: Leif Niclasen 85.
3-2: Andras Frederiksberg 88.

B36-07 Vestur 4-0 (1-0)
1-0: Róaldur Jakobsen br. 29.
2-0: Pætur Petersen 54.
3-0: Róaldur Jakobsen 70.
4-0: Patrik Johannesen 85.

Í gjár:

NSÍ-ÍF 3-0 (1-0)
1-0: Jann Benjaminsen 44.
2-0: Jann Benjaminsen 64.
3-0: Klæmint A. Olsen 74.