KÍ vann ein av klassisku dystunum í føroyskum fótbólti, tá HB varð sent aftur til Havnar við ongum. Avgerðandi málið kom beint fyri steðgin, tá KÍ royndi seg við stuttum horna. Tað endaði hjá Dioni Splidt uttanfyri brotsteigin, og miðvallarin gjørdi ikki mætari enn at seta bóltin í málhornið.

- Hatta var nakað, sum vit tosaðu um til venjing í gjár. Vit skuldu gera okkum dælt av økinum uttanfyri. Mikkjal (Thomassen) er ein ógvuliga analytiskur venjari, og hevur sæð veikleikarnar hjá HB í samband við deyðbóltar, segði Dion Splidt við Rás2 eftir dystin.

- Í tí eg temji bóltin, síggi eg hann í trýkantinum. Har var einki at ivast í, tá eg rakti hann.

Sebastian Pingel, sum kom inn fyri Ára Mohr Olsen eftir 20 minuttum, var vónbrotin av, at KÍ skuldi fáa mál eftir eitt stutt horna.

- KÍ eru sterkir upp á deyðbólt, men skora upp á tað, sum teir kanska ikki duga so væl, eitt stutt horna. Vit eiga at leggja trýst á í støðuni, og nærmasti maðurin skal út ímóti, og vit skulu hava bóltin burtur. Tað er skuffandi, segði Sebastian Pingel við Rás2.

Spurdur um hvussu hann er nøgdur við avrikið hjá HB í Effodeildini, nú níggju umfør eru spæld, og HB liggur níggju stig aftanfyri oddaliðið úr Klaksvík svaraði hann:

- Hetta er ikki nóg gott.

KÍ er oddalið í landskappingini, og við sigrinum á argu kappingarneytunum úr Havn, komu teir bláu upp á 19 stig. Víkingur er á øðrum plássi við 17 stigum, og NSÍ er nummar trý við 16 stigum.

HB er nummar seks við 10 stigum.