Minst 22 deyð og 59 særd í sjálvmorðsbumbuálopi í Manchester
Í minsta lagi 22 fólk lótu lív í gjárkvøldi tá ein bumba brast á einari konsert á Manchester Arena í býnum Manchester í Onglandi. Sambært løgregluni er talan um eitt sjálvmorðsbumbuálop.
Spreingingin hendi kl. 22:35 í gjárkvøldi, beint eftir eina konsert við amerikansku poppstjørnini Ariana Grande. Hon hevði júst framført fyri 21.000 áhoyrarum tá ein brestur hoyrdist. Vitnir siga, at tað var ein løta áðrenn fólk varnaðust at talan var um eitt bumbuálop. Fyrstu løtuna hildu tey at tað var eitt tekniskt brek, men so byrjaðu fólk at skríggja og royna at flýggja úr bygninginum. Onnur vitni, ið vóru nærri spreingingini søgdu, at tey fyrst hoyrdu ein hvøllan brest, og síðani eitt bjart ljós. Eisini verður greitt frá, at fullkomin ruðuleiki var inni á konsertstaðnum, og at deyð og særd fólk lógu allastaðni.
Í løtuni eru tað nógv fólk ið leita eftir sínum kæru við at leggja út eftirlýsingar á eitt nú Facebook.
Nógvir av fjepparunum hjá Arianu Grande eru ung og børn, og løgreglan hevur vátta fyri BBC at børn eru millum tey deyðu.
Ein onnur spreinging hoyrdist seinni. Men tá var talan um lut ið løgreglan hevði funnið, og sum man valdi at spreingja tí illgruni var um at talan var um eina bumbu. Luturin vísti seg tó at vera ófarligur.
Løgreglan í Manchester sigur, at talan var um ein einsamallan bumbumann, ið lat lív í spreingingini. Eftir øllum at døma brúkti hann eina heimagjørda bumbu. Løgreglan kannar nú um yvirgangsmaðurin arbeiddi einsamallur ella um hann var partur av einum størri toymi.
Tjóðartingsval verður í Bretlandi tann 8 juni, men eftir álopið í gjárkvøldi hava bæði Theresa May, forsætisráðharri, og Jeremy Corbyn, formaður í Labour, boða frá, at tey fyribils steðga við øllum valstríði. Fyrrapartin skal May á fund í so-nevndu COBRA nevndini, ið er samansett av viðkomandi ráðharrum og embætismonnum, at fundast og kunna seg um álopið.
Mest lisið í farnu viku
Samband
Heygsvegur 8
490 Strendur