Tað eru heimaliðini, sum hava betru kortini á hondini undan seinnu hálvfinalunum í kappingini um Løgmanssteypið, sum verða spældar við Løkin og í Gundadali seinnapartin. Bæði NSÍ og HB kunnu dúga upp á útivallarmál, tá KÍ og B36 koma á vitjan.

Í evstu løtu eydnaðist tað Pól Jóhannusi Justinussen at javna til 2-2 fyri runavíkingarnar móti KÍ í fyrru hálvfinaluni, sum varð spæld fyri tveimum vikum síðani. Tað málið kann gerast gull vert fyri NSÍ, sum tískil hevur tvey útivallarmál við sær á vøllin í dag.

Endar dysturin 0-0 ella 1-1 fer NSÍ í finaluna, og tískil skulu klaksvíkingar, sum vunnu kappingina í fjør, skora mál við Løkin. NSÍ og KÍ eru formliðini í føroyskum fótbólti í løtuni, og tað verður spennandi, hvønn leist venjararnir báðir velja til dystin í dag.

HB fekk ein 1-1 javnleik móti B36 í Gundadali í fyrru hálvfinaluni, tá teir reyðu og svørtu vóru útiliðið, og tí hava teir ein lítlan fyrimun undan dystinum í dag. Bæði liðini hava havt ávísar trupulleikar í Effodeildini, har tey halta aftaná oddaliðunum. Tískil kann plássið í steypafinaluni, og ein møguligur steypasigur 26 august, hava enn meir at siga enn vanligt fyri sigursvandu havnafeløgini.

Av teimum fýra feløgunum í hálvfinalunum er tað bert KÍ, sum hevur vunnið steypakappingina seinastu árini. Tað gjørdu teir sum sagt í fjør, tá teir vunnu á Víkingi eftir brotssparkskapping. Seinast B36 vann steypakappingina var fyri 11 árum síðani, HB vann fyri trettan árum síðani og tað er fimtan ár síðani, at NSÍ vann Løgmanssteypið.

Báðar hálvfinalurnar byrja klokkan 15.00.

Seinnu hálvfinalurnar í kappingini um Løgmanssteypið:

NSÍ-KÍ
HB-B36