Áhugavert lesara bræv frá Jaspuri Langaard, um at tunnilsgjøldini skulu niður. – Men har er ein setningur, ið ræðir meg: “Eisini er tað ein møguleiki at leggja allar undirsjóvatunlarnar í eitt felag, sum tá fær enn fleiri inntøkukeldur.”

Í mínari verð merkir hetta, at vit í Norðoyggjum og tey í Vágunum skulu gjalda meira, fyri at Jaspur skal sleppa bíligari.

Støðan er tann, at vit í Norðoyggjum og tey í Vágunum hava gjørt skylduna, sum varð áløgd okkum, tá ið Norðoyatunnilin og Vágatunnilin komu í eygað. – Í dag er støðan tann, at báðir tunnlarnir eiga pengar í milliónaklassanum standandi á bók. – Bara fyri tað innistandandandi, sum Norðoyatunnilin átti á bók við ársbyrjan 2020, skulu í millum 10.000 og 15.000 bilar koyra í gjøgnum, bara fyri at gjalda tað árligu negativu rentuna, sum bankarnir áleggja kundunum.

At gjaldið í Norðoyatunnlinum og Vágatunnlinum verður lækkað, er ein sjálvfylgja – helst skal verandi gjald heilt burtur, og ein annar fíggingarleistur finnast til vegakervið í Føroyum!

Aftur til Eysturoyðartunnilin. - Tað tykist sum um, at nøkur hava hug at gloyma, at Eysturoyðartunnilin ikki hevði verið komin, um Sandoyartunnilin ikki varð knýttur fíggjarliga saman við Eysturoyðartunnilinum. 

Sjálvandi skal tunnilsgjaldið ásetast so skynsamt sum gjørligt, soleiðis at tað verður lokkandi at koyra ígjøgnum. – MEN tað kemur ikki uppá tal at leggja tunnlarnir saman!

Eg og aðrir norðoyingar koma at hjálpa Jaspuri Langaard at gjalda Eysturoyða- og Sandoyartunnilin. – Hetta gera vit við gleði, eins og vit hava hildið okkara avtalur til punkt og prikkar við hinum tunnlunum!

Frimodt Rasmussen