Árni Frederiksberg og Klæmint A. Olsen sendu NSÍ í finaluna
Árni Frederiksberg og Klæmint A. Olsen revsaðu KÍ fyri eina laka byrjan, og sendu NSÍ í steypafinaluna eftir eina spennandi hálvfinalu, sum kortini endaði 3-0 til endans.
Endaliga úrslitið sigur ikki allan sannleikan um seinnu hálvfinaluna millum NSÍ og KÍ í dag. Dysturin var javnur, og spenningurin helt sær heilt til Árni Frederiksberg við tveimum málum avgjørdi alt móti dystarenda.
Eingin ivi er kortini um, at heimaliðið hevði uppiborið finaluplássið. Menninir hjá Anders Gerber vóru klárari frá byrjan, og løgdu trýst á, hóast tað var KÍ, sum skuldi hava mál fyri at sleppa í finaluna.
Hetta gav eisini úrslit í 12. minutti, tá Bárður J. Hansen skjey eitt innlegg úr vinstru síðu, og Klæmint A. Olsen vann á Ahmed Mujdragic og skallaði niður í jørðina og upp í horni aftanfyri Kristian Joensen í KÍ-málinum.
Mótbrekkan hjá KÍ gjørdist nú enn brattari, enn hon var undan dystinum, og klaksvíkingarnir máttu nú skora tvær ferðir, um teir skuldu sleppa í finaluna. Teir trýstu eisini NSÍ alsamt longur aftur, men Páll Klettskarð og Albert Adu vóru ikki nóg neyvir, tá teir høvdu møguleikar eftir innlegg.
Í seinna hálvleiki setti Mikkjal Thomassen, KÍ-venjarin, Hjalgrím Elttør á vøllin fyri Ísak Simonsen á vinstra bakki, og fyrrverandi landsliðsleikarin sendi fleiri farligar bóltar innfyri.
Hann lá kortini sera langt frammi á vøllinum, og NSÍ gjørdi sær dælt av plássinum millum Hørð Askham og Hjalgrím Elttør, tá Árni Frederiksberg avgjørdi fyri NSÍ við tveimum málum upp á tríggjar minuttir.
Báðu ferð varð kviki vongurin spældur innum verjuna til vinstru, og hann gjørdi einki mistak einsamallur við Kristiani Joensen. KÍ spældi til síðsta bríksl, men vistu væl, at teir høvdu mist takið á Løgmanssteypinum, sum NSÍ nú skal kappast við B36 um.
NSÍ-KÍ 3-0 (1-0)
1-0: Klæmint A. Olsen 12.
2-0: Árni Frederiksberg 78.
3-0: Árni Frederiksberg 81.
Mest lisið í farnu viku
Samband
Heygsvegur 8
490 Strendur