“Hóast fíggjarmálaráðharrin í 2013 tosaði alment um, at almennir stovnar skuldu fáa boð um at seta fleiri lærlingar, er í grundini einki hent á økinum. Heldur ikki eftir, at nýggja samgongan tók við.” Tað sigur Starvsmannafelagið í eini temagrein á heimasíðu felagsins.

Á landsfundinum hjá Fólkaflokkinum fyrst í november í 2013, segði Jørgen Niclasen, formaður floksins og táverandi fíggjarmálaráðharri, at Fíggjarmálaráðið hevði sett sær fyri, at seta fleiri lærlingar. Í røðu síni til landsfundin segði hann millum annað, at næsta stigið fór at vera at seta almennum stovnum krøv um lærlingar.

Áheitan onga ávirkan
“Henda fráboðanin var í tráð við tað, sum táverandi fíggjarmálaráðharri hevði sagt, tá hann legði uppskotið til løgtingsfíggjarlóg fyri 2014 fyri løgtingið, og hon var eisini í tráð við tað, sum ráðið hevði skrivað í einum brævi til landsins stovnar í november 2012,” sigur Starvsmannafelagið.

Í tí skrivinum staðfesti Fíggjarmálaráðið, at búskaparligu sveiggini høvdu havt ta ávirkan, at stovnsleiðslurnar høvdu verið afturhaldandi við at seta lærlingar seinastu árini, og í tí sambandi greiddi ráðið frá, at í landsstýrinum var semja um, at landsins stovnar áttu at taka inn fleiri lærlingar.

“Men hóast næstan fimm ár nú eru liðin síðan hesa útsøgn, er talið av lærlingum í almennum høpi ikki vaksin serliga nógv. Heldur ikki eftir, at Kristina Háfoss tók við sum landsstýriskvinna við fíggjarmálum fyri næstan tveimum árum síðan,” sigur Starvsmannafelagið.

Felagið vísir á hagtøl, sum Hilmar Augustinussen, nevndarlimur í Starvsmannafelagnum, hevur funnið fram til. Tey vísa, at arbeiðsføra fjøldin er 26.000 fólk, og at í almennum høpi eru bara 15 lærupláss. Tað svarar til 0,06% av arbeiðsfjøldini.

“Sambært Yrkisdeplinum vóru við árslok í fjør 774 aktivir lærusáttmálar, av teimum vóru 307 undirskrivaðir í fjør. Samlaða talið av lærusáttmálum svarar til trý prosent av arbeiðsfjøldini og talið av nýggjum sáttmálum í fjør svarar til 1,2 prosent av arbeiðsføru fjøldini,” sigur Starvsmannafelagið.

Felagið vísir á, at av teimum 307 nýggju lærlingasáttmálunum, vóru bara níggju sáttmálar gjørdir um skrivstovulærlingar í almenna sektorinum. Til samanberingar kann sigast, at privata vinnan gjørdi 26 nýggjar sáttmálar við skrivstovulærlingar.

Starvsmannafelagið fer ta komandi tíðina í fleiri greinum at varpa ljós á málið um manglandi lærlignar í almenna sektorinum.