Oddaliðið, KÍ, tekur við Djúpumýru ímóti 07 Vestur, og klaksvíkingarnir eru óivað svangir eftir øllum trimum stigunum, eftir at teir vórðu slidnir út úr steypakappingini Kristi himmalferðardag. Í landskappingini hevur gingið framúr væl hjá KÍ, sum hevur vunnið fýra ferðir á rað.

07 Vestur hevur tapt 0-4 tvær ferðir á rað móti ávíkavist NSÍ og B36, og dysturin móti KÍ er triði torføri útidysturin á rað. Seinast liðini hittust, vann KÍ 2-0 í Sørvági.

Víkingur á øðrum plássi tekur móti grannunum av Skála. Víkingur vann 1-0, tá liðini hittust í Sarpugerði í triða umfari, og teir ljósabláu eru favorittar aftur hesa ferð. Skála fekk sín fyrsta sigur hetta kappingarárið í seinasta umfari, tá teir vunnu 3-2 á EB/Streymi, og teir ynskja óivað at byggja á tað úrslitið.

HB tekur ímóti ÍF í Gundadali, og spælararnir hjá Sigfríði Clementsen skulu royna at lyfta seg, eftir stóra vónbrotið í steypakappingini, tá teir á ótrúligan hátt blakaðu 2-1 leiðsluna burtur í longdu leiktíðini, tá teir spældu níggju móti 11. Í Effodeildini er støðan heldur einki serlig. HB er í løtuni nummar seks við tíggju stigum - tað er níggju stig frá oddinum.

ÍF er aftast í Effodeildini, og fuglfirðingarnir hava trupult við at fáa stig, hóast spælið mangan hevur sæð rímiliga gott út.

TB/FCS/Royn tekur ímóti EB/Streymi við Stórá í Trongisvági, og suðuroyingarnir, sum hava tapt fýra ferðir á rað, skulu hava øll trý stigini, um teir framvegis vilja spæla við í ovaru hálvuni. EB/Streymur vann 1-0 á TB/FCS/Royn við Margáir fyrr í ár, og hava helst einki ímóti at endurtaka tað úrslitið.

NSÍ og B36 spæla fimta dystin í 10. umfari mánakvøldið við Løkin í Runavík. Allir dystirnir í dag byrja klokkan 15.00.

10. umfar í Effodeildini:
KÍ-07 Vestur
Víkingur-Skála
HB-ÍF
TB/FCS/Royn-EB/Streymur