-Eg veit ikki, nær tað er rætta løtan at fáa sær annað skip, men vit vóru komnir hagar, at vit nýttu ikki meiri pening uppá gamla Pison, sum er 60 ár og útslitin. So annaðhvørt var at gevast, og tað tímdu vit ikki, ella at fáa okkum eitt annað og betri skip, og tað hava vit gjørt,-
Tað sigur skiparin og ein av eigarunum av Pison, Eyðstein Sørensen.

-Útlitini eru so sum so beint nú við lágum fiskaprísum, eisini fyri longu, sum vit fiska nógv av, men prísurin á toski og stóru hýsuni er rímuliga góður. Oljuprísurin er rímiligur og rentan lá, so samanlagt hava vit gott mót, sigur hann.

-Vit vera 16 mans fyrsta túrin, men annars ætla vit at vera 14 og 15 við. Manningin er tann sama sum við gamla Pison, og tað eru raskir og garvaðir menn, sum nú skulu venja seg við eitt frystiskip. Vit koma at royna mest við Føroyar, og so hava vit nakað av kvotu í Grønlandi,- sigur Eyðstein.

Áðrenn teir loystu seinnapartin í gjár var andakt umborð. Eisini varð skip og manning løgd í Harrans hendur og signingin lýst.

Teimum og sjófólkunum annars verður ynskt Guds signing og varðveitslu.

Kelda: facebook.com/sjomansmissionin