-Eftir umstøðunum hevur fiskiskapurinn verið í lagi. Vit fóru út hósnáttina og gjørdu stutta roynd, áðrenn vit fóru undir land at kroka, vegna vánaliga veðrið. Tá vit komu út aftur á fiskileiðirnar, var fiskiskapurin rímuliga góður. Vit hava 180 kør, sum er umleið 65 tons, harav gott 50 kør eru toskur,-
Tað sigur Kristian Thomsen, skipari, á Lerki. Teir landaðu til Faroe Origin týsmorgunin.

-At royna við lemmum, hevur sínar fyrimunir, og at samtrola, hevur sínar. Tó vil eg siga, at tað er meiri spennandi at royna við lemmum, tí tá eru vit einsamallir og eru fríari at taka avgerðir, so sum til dømis, hvar vit skalt royna,- sigur hann.

-Vit eru bara sjey mans; so fáa vit væl av fiski, er tað strævið, tí tað verður lítil hvíld og svøvnur. Við samtrolara taka teir jú inn aðruhvørja ferð, meðan vit við lemmum taka trolið inn hvørja ferð, vit hála,- sigur hann.

-Tað hevur verið smáligt við upsa í vetur, hóast vit eru komnir inn í góðari tíð eftir upsa. Men vónandi verður tað betri og kanska okkurt tíður uppá tað. Hitin á botni er komin niður á 6-7 hitastig; og tað er ein góður hiti fyri upsa, so vit hava gott mót,- sigur Kristian Thomsen.

Sjómanstrúboðarin vitjaði umborð til eitt prát. Tíð var eisini til Guds orð og bøn.
Lerkur vór avstað aftur í gjárkvøldið.

Teimum og sjófólkunum annars verður ynskt Guds signing og varðveitslu.

kelda: https://www.facebook.com/sjomansmissionin