Spolandi seymimaskinur og lívsjáttandi barnafjas
Í Toylon í J. H. Schrøtersgøtu miðskeiðis í høvuðsstaðnum hoyrist blandingurin millum eyðkendu og títtu ljóðini frá seymimaskinum, ið spola avstað, og lívsjáttandi barnafjas. Tað eru mammur í barnsburðarfarloyvi, sum hittast til skeið í seyming á Tórshavnar Kvøldskúla. Í hugnaligum umhvørvi. Tær hugna sær og práta um børn og felags áhugamál. Tað sæst, at teimum dámar løtuna og góða selskapið. Men tær arbeiða eisini miðvíst. Læra. Taka til sín. Og seyma.
- Skeiðið er sera vælumtókt, og tað hevur bara vundið upp á seg. Vit merkja ein stóran og vaksandi áhuga, sigur Súsanna av Teigum, sum er undirvísari og leggur mammunum og teimum luttakandi lag á við seymingini.
Tað ger hon eisini seinni á degnum. Tá er skarin av luttakarum meira blandaður og fyri allar aldursbólkar. Seyming fyri øll. Tað skeiðið er eisini sera vælumtókt. Skeiðini eru fullteknað, sigur hon.
Tórshavnar Kvøldskúli er ein livandi skúli við nógvum og fjølbroyttum tilboðum. Kreativu lærugreinarnar eru sera vælumtóktar.
At seyma er gamalt og hevur framvegis fastatøkur tvørtur um ættarlið. Verður kagað í faldaran frá kvøldskúlanum fæst sjón fyri søgn, tí ein ørgrynna av skeiðum í seyming eru í útboði. Summi skeið endaðu fyri jól í fjør, men enn eru tey virkin á øðrum skeiðum.
Og væl er komið burtur úr hjá teimum, sum í vetur hava seymað á kvøldskúlanum. Barnaklæði, taskur og føroysk klæði, bara fyri at nevna ein lítlan brøkpart av tí nógva og fjølbroytta, sum er evnað til á kreativa seymiverkstaðnum.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur