Í samband við landsinnsavnanina hjá Bláa Krossi Føroya 8. mai verður stuðulskonsert í Løkshøll leygarkvøldið 8. mai

kl. 19:00. Tiltakið er partur av árligu landsinnsavnanini hjá Bláa Krossi Føroya, og peningurin fer til fyribyrgingararbeiðið millum børn og ungdóm í Føroyum við verkætlanunum www.barnaar.fo og www.livlivid.fo.

Hetta kemur eisini at síggjast aftur á tiltakinum í ár, ið bæði hevur góðar tónleikaframførslur umframt eina persónliga søgu og frásøgn frá nøkrum av okkara dugnaligu starvsfólkum.

Á skránni eru tónleikaframførslur við:

• Lena Anderssen
• Suð
• Esmar Fagraberg

Afturat tí er eisini ein persónlig søga á skránni. Ranvá Knudsen kemur at greiða frá síni søgu, har vit fáa innlit í, hvussu tað er at vaksa upp einum heimi, har rúsdrekka hevur fylt nógv, og hvussu hon hevur fóta sær.
Eisini koma nøkur av okkara sera dugnaligu starvsfólkum at siga frá arbeiðinum, og hví hetta hevur so stóran týdning.

Eitt sindur um tónleikin
Av tónleikainnsløgunum kunnu nevnast fanstastiska Lena Anderssen, ið fleiri ferður áður hevur verið við til tiltøk hjá Bláa Krossi. Hon kemur at framføra nøkur av sínum fantastiska sterku løgum. 

Eitt annað tónleikainnslag, ið kann nevnast, er Esmar Fagraberg. Esmar er ein av nýggju og sera spennandi spírunum á føroyska tónleikapallinum. Hann gav herfyri sítt fyrsta staklag út, ”Brother”, sum er væl móttikið. Esmar kemur við síni sera sterku nærveru og inniligu sangum.

Kvinnukórið Suð úr Klaksvík bergtekur hvørja ferð við sínum vøkru og lívligu framførslum. Steinvør Fonn er kórleiðari. Kórið hevur nógv ár á baki og syngur alt frá klassiskum til sálmar, fosturlandssangir, norðurlendskar sangir, negro sprirituals og gospel.