Heilsu- og umsorganartænastan hjá Tórshavnar Kommunu hevur skipað fyri fimm daga longum skeiði í demens, og í dag hava starvsfólkini fingið prógv. Hetta er annað skeiðið av sínum slag, sum H&U bjóðar út til starvsfólk á øllum deildum í H&U í ár.

Tvey skeið hava verið higartil og eftir ætlan vera tvey skeið aftur í heyst. Allir undirvísarir á skeiðnum, eru føroysk heilsustarvsfólk við servitan innan demens, og kenna demensøkið í Føroyum væl.

Skeiðið gevur luttakarunum grundleggjandi vitan um viðkomandi hugtøk og evni í røkt og viðgerð av fólki við demenssjúku. Endamálið við skeiðnum er at menna dygdina í arbeiðinum hjá heilsustarvsfólki á demensøkinum hjá H&U, tá tað snýr seg um røkt, viðgerð, vegleiðing, stuðul og umsorgan fyri menniskjum við demens og teirra avvarðandi.

Eisini fáa tey amboð til at loysa avbjóðingar, sum tey í sínum arbeiði uppliva, at borgarar við demens og teirra avvarðandi standa við.

Leiðslan í H&U fegnast um at starvsfólkini hava tikið so væl undir við skeiðnum, og nú hava lokið skeiðið, og ynskir luttakarunum hjartaliga til lukku og hepna hond í teirra áhaldandi menning av tænastuni til borgarar við demens og teirra avvarðandi.  

Undirvísari er Jónvør Christiansen, samskipari á grundskeiðnum er Herborg Petursdóttir, eindarleiðari er Ingun Eidesgaard.

Tilsamans 22 luttakarar fingu prógvini handað í gjár.