Nú er greitt, at tónleikafestivalurin, sum upprunaliga skuldi vera við Leitisvatn, verður í Norðadali dagarnar 2. til 4. juli. “Øll loyvir og samskipan við mynduleikar er upp á pláss og alt gongur upp á stás”, sigur ein ovurfegin Bjørk Sjóðklett, sum er ein av fyriskiparunum.

Upprunaliga var ætlanin, at festivalurin skuldi vera við Leitisvatn í Vága Kommunu, men so fekk kommunan aðrar tankar, saðlaði um og trekti loyvið aftur frá fyrireikarunum. Hetta elvdi til nógv órógv fyri fyrireikararnar, og tað gjørdi ikki støðuna betur, tá KVF misskilti støðuna, og boðaði frá í tíðindunum, at festivalurin varð avlýstur. Men so er als ikki – tí festivaurin verður nú í vakra umhvørvinum í Norðadali í staðin. Har er enn vakrari, meira avsíðis og tættari við Havnina. “Vit eru sera takksom fyri, at mynduleikarnir í Tórshavn hava hjálpt okkum við at flyta festivalin innanfyri so stutta tíð”, sigur Bjørk.

”Nýggja avgerðin hjá Vága kommunu, sum hevði sum undanførslu, at Leitisvatn skuldi verjast, gav als onga meining, tí vit vóru ongantíð ein hóttan í móti vatninum. Vit høvdu fyrireika okkum ordiliga væl við staðsetingum, hegni og skeltum, umframt vaktum, skuldu syrgja fyri, at ongin og einki kom í vatnið. Sum nú er, verður Leitisvatn annars konstant dálkað. Bátar sigla á vatninum, fólk svimja í vatninum, nógvir bilar koyra framvið vatninum við teirra osi, flogfør flúgva uppi yvir vatninum fleiri ferðir um dagin við teirra osi, og harumframt rennur kloakk úr húsum beinleiðis niður í vatnið - So tað er rættuliga eyðsæð, at hetta egentliga ikki snúði seg um Leitisvatn, men heldur um, at nýggi borgarstjórin í Vága Kommunu heldur vildi renna ørindi fyri einkultar persónar í kommununi – sum er nokk so synd fyri heildina”, sigur Bjørk í stuttari viðmerking.

”Vit hava nú okkara fokus á, at fyrireika festivalin í Norðadali, í meðan okkara advokatur er í gongd við at fyrireika eitt endurgjaldskrav móti Vága kommunu”, sigur Bjørk, sum samstundis eisini upplýsir, at tey hava mist fitt av peningi upp á hetta við Vága Kommunu. 

Øll loyvir og tað mesta av fyrireikingini í Norðadali er nú upp á pláss, so nú gleða øll seg bara til, at njóta hendan nýggja og annarleiðis festivalin, sum verður hildin dagarnar 2. til 4. juli.