Nú Gunvør á Lava alment legði frá sær í dag i forskúlanum í Sankta Frans Skúla, so hevur hon verið har í meira enn 40 ár – men áðrenn tað var hon í meira enn 10 ár í barnagarðinum hjá nunnunum.

Borgarstjórin helt í røðu fyri Gunvør, at hetta bæði var ein søguligur dagur, ein hátíðardagur og sjálvsagt eisini ein sorgardagur fyri skúlan, tí tilsamans tosa vit um meira enn hálva øld í tænastuni. Og nú gevst hon.

- Tú hevur ávirkað og sett tín dám á eina ómetaliga rúgvu av børnum – eg haldi tú eisini hevur sett tín dám á øll míni børn, sum øll hava gingið í forskúla hjá nonnunum. Ein tíð, sum tey og vit eru ómetaliga glað fyri at minnast aftur á.

- Vit kenna teg sum sera pliktuppfyllandi, vælgjørda og kreativa. Tú ert sera góð við børnini og hevur barnatekki burturav – so børnini hava elskað teg, hóast tú onkuntíð hevur verið bæði strongd og striks.

- Tað kann aldri yvirmetast, hvussu stóran týdning tað hevur at hava so trúgv starvsfólk. Starvsfólk, sum hava havt ymsar og fjølbroyttar arbeiðsuppgávur, og hava møtt nógvum avbjóðingum gjøgnum eitt langt arbeiðslív. Tílík, sum vita alt og duga alt.

- Tað einasta keðiliga við tílíkum fólkum sum tær er, at tey eru so heilt ótrúliga torfør at erstatta. Fólk við tílíkum innliti og slíkum royndum hanga altso ikki á trøunum, og tí er tað ein stórur missur fyri allan býin, at tú nú gevst í tínum arbeiði.

- Sostatt verður á fleiri hættir saknur í tær. Hinvegin, so hevur tú væl og virðiliga gjørt tína skyldu og tikið títt tørn, so tað skal vera tær væl unt, at tú nú sleppur at taka tær av løttum.

- Tú og Bent eiga tvey børn og ein ommuson, tit búgva í vesturbýnum og hava stóran havagarð, sum tú gongur høgt uppí. Tað er gott frítiðarítriv – næstan sum at hava eina trøð!

- Tit bæði eru campistar og dáma væl at ferðast við kampingvogni innan- sum uttanlands, so tit duga at liva lívið og hugna tykkum. Og tá tú annars onki gert – ja, so bindir tú.

- Eg fari at takka tær fyri, at tú altíð hevur verið ein fyrimynd her í forskúlanum, og at tú hevur borið tær góðu siðvenjurnar hjá nonnunum víðari.

- Eg fari eisini at takka tær hjartaliga fyri títt stóra íkast og tína drúgvu tænastu fyri børnini og foreldrini í kommununi. Takk fyri alt og blíðan byr víðari, segði Heðin Mortensen, borgarstjóri, at enda.