Hósdagin 8. juli byrjar túrurin hjá Team Rynkeby Føroyar við tiltaki klokkan 10.30 á Helnabrekku í Klaksvík. Eftir tiltakið í Klaksvík verða fyrstu 100 kilometrarnir á túrinum súkklaðir, tá ið leiðin gongur til Havnar umvegis Toftir og gjøgnum Sundalagið, áðrenn liðið endar í Havn. Á leiðini suður vitjar Team Rynkeby nakrar av stuðlunum, og møguleiki verður at heilsa upp á súkklararnar.

Skráin fyri túrin er hendan:

Kl. 10:30: Helnabrekka í Klaksvík.

Kl. 11.15: Fráferð úr Klaksvík.

Kl. 13.05: Bátafelagið á Toftum.

Kl. 13:50: Betri í Saltangará

Kl. 14:25: Bakkafrost.

Kl. 15:55: Margáir.

Kl. 18:25: Móttøka í Perlutorginum við Reinsaríið.

Seinni um kvøldið fer liðið við Norrønu.

Leygardagin 10. juli kemur Norrøna til Hirtshals. Henda fyrsta dagin í Danmark gongur leiðin úr Hirtshals til Løgstør, og strekkið er 109 kilometrar.

Sunnudagin verður súkklað úr Løgstør til Ringkøbing, umleið 180 kilometrar.

Mánadagin er longsti dagur við 193 kilometrum. Tá súkklar Team Rynkeby Føroyar eftir vestursíðuni á Jútlandi til Tønder, tætt við týska markið.

Týsdagin gongur leiðin til Svendborg á Fjóni – umleið 150 kilometrar.

Mikudagin súkklar liðið 174 kilometrar. Súkklararnir fara suðureftir til Taasinge og Langeland, aftur til Fjón og enda hendan dagin norðuri á oynni, í býnum Middelfart.

Hósdagin eru ikki so nógvir kilometrar, men tá fær liðið fleiri hæddarmetrar í beinini enn hinar dagarnar. Súkklararnir koma aftur til Jútlands, súkkla nakrar brattar brekkur í Vejle, og ávegis til Silkeborg súkklar liðið niðan til Himmelbjerget. Kilometrarnir hendan dagin eru 130 kilometrar.

Fríggjadagin súkklar liðið til Randers, framvið Mariagerfjord og eftir eystursíðuni á Jútlandi og enda dagin í Aalborg; umleið 152 kilometrar.

Leygardagin 17. juli er síðsti dagur á túrinum. Hendan dagin skuldi liðið komið til París, men Team Rynkeby súkklar 69 kilometrar - úr Aalborg til Hirtshals, har túrurin endar, og flestu súkklararnir fara heim aftur við Norrønu.

Samanlagt súkklar Team Rynkeby Føroyar 1260 kilometrar á túrinum.