Tey í Team Rynkeby fara avstað í kvøld
Øll í Team Rynkeby Føroyum fara í kvøld av landinum at súkkla. Borgarstjórin, Heðin Mortensen, helt eina vælkomurøðu á Perlutorginum áðrenn fráferð.
Góðu súkklarar! Góðu tit øll!
“Viljin er sterkasta svørðið,
bítur á harðasta stál.
Vónin er bjartasti brandur,
lýsir tær veg fram á mál.”
Hesi vøkru sannleiksorð yrkti Martin Joensen í sanginum “Morgun”.
Ein sangur, hann skrivaði til sín nýfødda son, men eisini ein sangur, vit í fluttum týdningi kunnu hava í huga, nú Team Rynkeby enn einaferð fer væl mannað á tvíhjúlaða uttanlandsferð.
Sanniliga krevur tað sín vilja at fara slíka ferð, tí aftanfyri liggja hundraðtals venjingartímar, ið ikki høvdu latið seg gjørt uttan tykkara stálfasta vilja.
Og eingin fer við Team Rynkeby bara fyri súkklingina skyld, men tí okkurt djúpri liggur aftanfyri.
Tit hava hvør í sínum lagi eina søgu ella onkra lívsroynd, ið hevur fingið tykkum at taka við hesi heilt serligu avbjóðingini, ein hundrað og túsundtals kilometra langur súkkutúrur er.
Hvør einasti av tykkum verður drivin av eini góðari vón, ið lýsir framman fyri tykkum, so tit bæði í bókstaviligum og fluttum týdningi tráða eftir at koma á mál.
Henda súkklutúrin eru tit byrjað í dag, og nú Havnin er fyribils endastøð fyri tykkara fyrsta degi, vilja vit bera tykkum bestu kvøður um eina góða og væl eydnaða ferð.
Vit ynskja fyri tykkum, at tit sleppa undan punkteringum og óhappum, regni og mótvindi og øllum tí, sum annars kann darva á leiðini.
_ _ _
Síðani 2014 hava føroyingar havt sítt egna Team Rynkeby á longu súkkluferðini til París, men hóast korona enn órógvar, so illa ber til at fara allan vegin til París, kann minni eisini gera tað.
Tí er tað, at vit nú veittra tykkum farvæl og ynskja tykkum góða ferð við Norrönu í kvøld, nú tit fara til Danmarkar at súkkla í eina viku.
Brekkurnar verða nokk ikki tær somu, men endamál tykkara við ferðini er gott og savnandi, so tí eru vit vís í, at nógv gott fer at koma burturúr – bæði sum uppliving hjá tykkum og sum ein góður ágóði til børn í krabbameinshøpi.
Hetta er vælgerðararbeiði, tá ið tað er best, tí eingin kann finna eina umbering fyri ikki at vilja tykkara góða endamáli væl, og tí kann eg vegna okkum øll siga av hjarta: Góða ferð!
Eg veit, at tit í Team Rynkeby Føroyar eru væl fyrireikað og hartil eisini væl fyri, nú vant hevur verið dúgliga, og tit skulu bara vita, at vit stuðla tykkum allan vegin!
Og so haldi eg, at vit skulu rópa eitt trífalt hurrá fyri súkklarunum…
Heðin Mortensen
borgarstjóri
Fleiri myndir síggjast á facebook
Mest lisið í farnu viku
Samband
Heygsvegur 8
490 Strendur