Álit, tilmælir og "sáttmáli" við fólkið - hetta hevur verið kjarnin í politisku handfaringini av innrásini av korona farsóttini í Føroyum.

Síðan mars mánaða í fjør hava føroyingar í felag aftur og aftur tikið stór tøk og offrað nógv fyri at basa spjaðingin av covid19 og verja tey veiku í samfelagnum.

Trúfast hava okur góðtikið at stór felags tøk skulu til fyri at sleppa sum best ígjøgnum korona-tíðina - og okur hava tikið tøkini!

Trúfast hava okur hildið okkara part av "sáttmálanum", sum landsins myndugleikar gjørdu við fólkið í fjør.
Seinastu vikurnar eru smittu-tølini tíverri aftur hækkaði og hetta hevur ført við sær, at ein røð av tiltøkum og tilboðum kring landið aftur eru avlýst.

Alt tiltøk sum 1000tals føroyingar hava glett seg til í mánaðir. - Tiltøk sum fyritøkur, frítíðarfelagsskapir, samkomur, ítróttarfeløg skipað ár um ár - og fyri summi eru tiltøkini avgerandi fíggjarligt grundarlag fyri framtíðar virksemi.
Trúfast hava okur góðtikið enn einaferð at gera enn eina lutvísa "niðurlukking" av samfelagnum fyri felagsskapins skuld - í tráð við kósina, sum landins myndugleikar hava lagt.

"Sáttmálin" varð gjørdur millum landins leiðslu og okkum føroyafólk. Men eftir at okur í samfullar 15 mánaðir hava hildið "sáttmálan" fult og heilt, uttan stórt hóvasták, eru okur stungin í bakið av hinum sáttmála partin.
Landins leiðsla skipar í hesum døgum fyri stórum tiltøkum kring landið. Tiltøk sum savna 100tals fólk - eins og myndin úr Havn í dag vísir.

Samstundis er greitt, at G-festivalurin, Vestanstevnan og Summarfestivalurin eru avlýstir. Kappróðurin á Vestanstevnu verður aftur uttan áskoðarar á kappróðrarøkinum. Summarstevnur hjá samkomunum eru avlýstar. Stóra mentunarvikan Ljósfestin í Vági er avlýst. Matstovur stongja og tað sama gera skeinistøð. Stór ítróttartiltøk eru fyri framman og fyriskiparar eru helst við at missa svøvnin - fer alt í vaskið ella hvat!?

Meðan okur hava hildið okkara part av "sáttmálanum" verður nú pissað uppeftir rygginum á okkum.

Dennis Holm