Tað var ein hátíðarlig løta á Bursatanga í gjár, tá ið Knørrafelagið róði undan við Westward Ho aftaná.

Síðani kom Margretha drotning, og almenna vitjan hennara í Føroyum byrjaði.

Sluppin er nýumvæld og nýmálað. Og sum myndirnar vísa, tók hon seg væl út við signalfløggum og við flagginum hjá Tórshavnar kommunu á toppmastrini.

GHM spældi eisini umborð – bæði tá ið Westward Ho stevndi inn á Bursatanga og á veg útaftur.

Dannebrog skuldi eftir ætlan leggja at, men vegna tøkniligar avbjóðingar, gjørdist hetta ikki gjørligt. Í hennara stað kom Westward Ho sum eitt virðiligt umboð fyri okkara siglandi arv.

Tórshavnar kommuna eigur Westward Ho, og áhugafelagið Sluppvinir hevur dagliga raksturin um hendi.