”My name is Bond – James Bond”. Soleiðis ljóðar ein av kendastu setningunum í altjóða filmsheiminum. Og nú hevur Bond so eisini føroysk filmsbond, ella í øllum førum upptøkur úr Føroyum, - skilst.

Samstundis verður føroyska røðin TROM gjørd í Føroyum. Ein filmsrøð, ið er seld fleiri útlendskum sjónvarpsrásum.

Áhugin fyri Føroyum innan filmsframleiðslu og sjónvarpsheimin veksur alsamt, samstundis, sum føroysk  filmsframleiðsla  hevur ment seg nógv seinastu  árini. Duga vit at lofta tí, kann filmur og filmsmentan av álvara gerast ein vinna í Føroyum.

Vit mugu hava størri ambitiónir
Vit mugu vera meira ambitiøs. Seta okkum hægri mál. Tí vit vita, at hvør króna sett í dygdarfilm, kemur fleirfalt aftur. Bæði TROM og Bond eru dømi um tað.

Tí hava vit lagt fram enn eitt uppskot um filmsvinnu fyri Løgtingið. Hesaferð um at seta á stovn Filmgrunn Føroya. Vit mæla til, at munandi størri upphæddir verða setta av til stuðul til filmsframleiðlu og til afturberingarskipanina fyri útlendskar filmar, framleiddir her heima. 

Tað reið um snarið, hvørt sjónvarpsrøðin TROM fór at verða framleidd her heima. Vit í Tjóðveldi løgdu stóra orku og gjørdu okkara til at fáa uppraðfest afturberingarskipanina, saman við góðum kreftum úr fleiri flokkum. 

Men, vit mugu hugsa longur fram. Tað skal eingin ivi vera hjá filmsfólki um, at tað loysir seg at velja Føroyar til filmsgerð. 

Vit mugu vilja tryggja, at eisini hin næsta filmsrøðin ella stórfilmurin, ið kann framleiðiast her, verður framleiddur í Føroyum. Vit vita, at tað loysir seg fyri landskassan. Væl eisini. 

Arbeiðspláss og inntøkur
Føroyar  hava nú av álvara møguleikan at gerast eitt filmsland, har føroyskir filmar og útlendskir filmar framleiddir her verða útflutningsvøra til altjóða marknaðin.

Koma fleiri filmslið hendaveg at gera upptøkur, fer tað eisini at merkjast í øðrum vinnum í samfelagnum. 

Tað fer eisini at merkjast kring landið, tí filmsvinna er væl egnað til at skapa kreativ størv bæði í útjaðara og miðstaðarøkjum.

Umframt fjøltáttað arbeiðspláss til teirra, ið fáast beinleiðis við filmsframleiðsluna – leikmanning, fotograftar, teknikarar, klipparar, osfr. -  fer hetta at geva arbeiði til aðrar vinnur, og stórar inntøkur frá avleiddum virksemi.

Gistingarhúsini fara at hava meira at gera, tí filmsliðini eru ofta stór. Handverkarar fara at fáa uppgávur, tí ofta er tørvur á handverkarum til slíkar framleiðslur. Matveitarar fáa hópin av uppgávum, tí øll skulu eta, og klædna- og sniðgevar fáa uppgávur - bara fyri at nevna nøkur.

Lærupláss innan filmsvinnuna
Ein styrkt føroysk filmsvinna fer eisini at styrkja fakliga umhvørvið í Føroyum. Tað ber í sær, at fleiri lærupláss innan filmsvinnuna vera til taks. Tað verið seg fotografar, framleiðarar, ljóðfólk, ljósfólk og annað.

Mál og menta verða styrkt
Harumframt er filmsframleiðsla ein týðandi táttur í tí at varðveita og styrkja føroyska samleikan, okkara mál og mentan. Ikki minst í mun til børn okkara og ungu, hvørs gerandisdagur í so stóran mun verður ávirkaður av filmi og filmsmáli.

Bjørt Samuelsen, forkvinna í Vinnunevndini
Beinta Løwe, forkvinna í Mentanarnevndini