Jólatræið tendrað á Vaglinum
Kl 16 seinnapartin tendraði jólatræið á Tinghúsvøllinum. Anne Mette Greve Klemensen legði fyri. Síðan bar Tórdis Lóa Tórhallsdóttir, býráðslimur í Reykjavík, heilsu úr Íslandi, og aftaná helt Heðin Mortensen, borgarstjóri, røðu.
Borgarstjórin byrjaði við at ynskja øllum vælkomnum á Vaglið.
- Góðan dag góðu børn, góðu havnarfólk og gestir úr øllum Føroyum, ið saman eru komin á Vaglinum í dag, nú vit enn einaferð lata upp fyri jólahugnanum í okkara høvuðsstaði.
Nú birtast túsund jólaljós
í hesi myrku stund,
og túsund onnur glógva nú
á himna bláu grund
- Um eina lítla løtu tendra vit jólatræið.
- Eins og undanfarin ár hevur eisini hetta træ sína serligu og ævintýrligu søgu. Spírin vaks á markinum millum Evropa og Asia, langt uppi í kavaklæddum fjøllum, har hægsti tindurin stingur heilar sjey ferðir so langt upp í loft sum Slættaratindur.
- Nakrir spírar endaðu í farnu øld í Íslandi, har teir hava vaksið seg stórar og sterkar í Heiðmørkini uttanfyri Reykjavík í væl meira enn hálva øld.
- Seinnu árini hevur verið siðvenja, at Reykjavík hevur latið Havnini eitt jólatræ á hvørjum ári at prýða Havnina, til gleði fyri stór og smá.
- Eg fari at takka Reykjavíkar býráð fyri hesa gávu, og fari at biða Tórdis Lóu Tórhallsdóttir, sum í dag er gestur okkara úr Reykjavík, heilsa heima og takka hjartaliga fyri jólatræið.
- Tað var ikki fyrrenn í 1934, at fyrsta kommunala jólatræið varð tendrað undir tinghúsinum. Tað eru sostatt í ár 87 ár síðan.
- Hesi 87 árini hevur Havnin tikið ímóti gestum úr øllum landinum við einum lýsandi jólatræi á Tinghúsvøllinum. Hesin hugnaligi siður verður í dag hildin í hevd um alla kommununa.
- Vit brúka tíð, orku og pening uppá at pynta býin við eittans einum endamáli: At skapa gleði og hugna í eini annars myrkari tíð.
- Ein kendur rithøvundur segði einaferð, at jól eru ikki bara ein ávís árstíð. Jól eru ein kensla.
- Jólini eru fram um alt barnanna hátíð. Tí hugsa vit altíð mest um familjuna við børnunum í fokus. Um felags hugna og felags átøk.
- Og tá Havnin soleiðis verður vertur fyri øllum landsins íbúgvum, so er natúrligt, at øll tilboðini eru soleiðis snikkað til, at nakað er fyri alla familjuna.
- Havnin er gamal keypsstaður, og tað sæst aftur í hugnaligu býarmyndini. Og vit hava eisini hesaferð lagt okkum eftir at skapa nakað, soleiðis at øll familjan fær eina heilt øðrvísi uppliving í býnum.
- Vit fara inn um portrið í jólagøtuni, vit brúka allar okkara sansir. Vit fara inn í ein ævintýrheim. Tað rýkur av jólabakstri. Har er nógv, sum bæði vit tilkomnu og børnini hava gleði av.
- Tað hevur nógv at siga, at borgarar savnast til tiltøk í miðbýnum, tað skapar trivnað og samanhald. Her er snotiligt og vakurt allastaðni. Hetta kemur ikki av sær sjálvum, men av planlegging, samstarvi, ídni, fakligheit og áræði.
- Tað hava tit, fyrireikarar og starvsfólk, øll uppiborið eina stóra tøkk fyri.
- Á jólum gerast vit øll børn aftur. Vit leita minnini framaftur frá barnaárunum og frá jólunum. Vit minnast jólasøgurnar, og vit frøast saman.
- Og vit gloyma ikki Jesusbarnið, sum er orsøkin til, at vit halda jól. Vit fara á barnakonsertir, og mong okkara njóta tónleik ella bara eina stilla løtu í dómkirkjuni, sum stendur opin fyri gestum hiðani til jóla.
Í sanginum “Eg eri so spent til jóla” syngja børnini:
Tað er so leingi at bíða –
hygg nú fer mánin at líða
Øll hava so nógv at gera –
eg veit ikki, hvar eg skal vera.
- Men nú skulu vit ikki bíða leingi aftrat, tí nú fara ljósini at glógva enn einaferð fyri okkum øllum her á Vaglinum.
- Hiðani av Vaglinum skal ljóða eitt ynski um eini gleðilig jól til øll børn í Føroyum og familjur teirra.
- Og ein hjartalig tøkk til Havnar Hornorkestur og GHM fyri trúfasta luttøku og fyri enn einaferð at seta okkum øll í jólahýr.
- Og túsund takk til tykkum á Brandstøðini, fyri at tit koma við gomlu brandbilunum og at tit koyra jólamannin úr fjøllunum oman á Vaglið.
- Nú verða jól! Og í menniskjum góður tokki! Gleðilig jól, øll somul, segði Heðin Mortensen, borgarstjóri, at enda.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur