Partabrøv og lánsbrøv

Í triðja ársfjórðingi av 2022 er afturgongdin, sum vit sóu á virðisbrævamarknaðum í fyrra hálvári, hildin fram.

Stóra evnið á fíggjarmarknaðum seinastu tíðina hevur verið høga inflatiónin, sum leiðandi tjóðbankar dúgliga royna at
tálma. Hetta gera teir í løtuni einamest við at hækka tjóðbankarenturnar. Hækkingarnar í leiðandi tjóðbankarentum hava verið stórar, og hava borið við sær, at eisini lánsbrævarentur eru hækkaðar nógv.

Rentan á amerikanskum 10-ára statslánsbrøvum var 3,83% síðst í triðja ársfjórðingi, eftir at hon við ársbyrjan var 1,51%. Renturnar á týskum og donskum 10-ára statslánsbrøvum eru eisini hækkaðar, úr ávikavist -0,18% og 0,08% við ársbyrjan til 2,11% og 2,59% síðst í triðja ársfjórðingi. 

Við framhaldandi rentuhækkingunum eru avkastkrøv hjá íleggjarunum eisini hækkað, og samsvarandi eru lánsbrøv og partabrøv minkað í virði. Alheimspartabrøv eru minkað við -6,58% í triðja ársfjórðingi, meðan donsk statslánsbrøv, sum hava 5 ár til lokadag, eru minkað við -3,74%.

Hóast framtíðarútlitini fyri fíggjarmarknaðin í løtuni eru óviss, eitt nú orsakað av krígsstøðuni í Eysturevropa og
framhaldandi strongum Covid-19 leiðreglum í eitt nú Kina, so er nógv, ið bendir á, at tað verður inflatiónsgongdin, sum fer at seta dagsskránna komandi tíðina. 

Ov høg inflatión verður mett sum skaðilig fyri búskapin. Hon rakar millum annað umvegis minkandi keypiorku hjá húsarhaldum, vinnulívi og samfelagi sum heild, men eisini umvegis eitt nú rentuhækkingar hjá tjóðbankum, sum royna at fáa inflatiónina at lækka aftur.

Í kjalarvørrinum á hesum mugu sannlíkindini fyri, at vit ganga ímóti einum tíðarskeiði við búskaparligari afturgongd, metast at verða økt.

Tí hava vit eisini valt at tillaga íløgusamansetingarnar fyribils, soleiðis at tær eru betur førar fyri at standa ímóti afturgongd. Sum áður nevnt vilja vit tó varðveita eina langskygda íløgusamanseting, og miða eftir at skapa eitt støðugt avkast yvir longri tíð væl vitandi, at tað sjálvandi verða sveiggj á vegnum.