Nú val stundar til og tilfeingisrentan ivaleyst verður eitt evni av mongum, hava vit hugt í útrokningar av tilfeingisrentuni. Fiskimálaráðið eigur ein formil, har tøl verða sett í, sum so vísa, hvussu stór tilfeingisrentan er.

Grannskoðarafelagið Januar gjørdi í nógv ár eina greining av fiskiflotanum. Tøl úr hesari greining blivu brúkt til frymilin, hóast tey ikki vóru ætla til hetta. Januar gavst fyri nøkrum árum síðan at gera hesa greiningar - helst tí at tølini blivu brúkt til annað enn tey vóru ætlaði til.

R7 hevur hugt eftir hesum útrokningum. Tað er nógv sum kann viðmerkjast. Í dag hyggja vit eftir útroknaðu tilfeingisrentuni og avlopið aftaná skatt.

Vit síggja at útroknaða tilfeingisrentan er á leið 2,5-3 ferðir so stór sum úrslit aftaná skatt. Tað áttu búskaparfrøðingar at skilt, merkir, at tølini teir tosa um, ikki eru til. Møguliga skilja teir tað ikki. Kanska hava teir størri álit á einum rokniarki enn egnum viti og skili. Kanska er tað politiska sannføringin, sum ávirkar. Í øllum førum kann staðfestast, at øll vanlig fólk høvdu skilt, at her er onkur feilur í útrokningunum.

Samanberingin vísur rættuliga greitt, at tilfeingisrentan, sum búskaparfrøðingar tosa um kann koma í landskassan, bara er ein brotpartur av tí búskaparfrøðingar siga hana at verða.

tilfeingisrenta