29 november fáa vit tilmæli frá ICES um toskaveiðu fyri 2023. Útlitini eru ikki góð.

Tilmæli seinasta ár var at vit kundu fiska 2.206 tons í livandi vekt. Sambært Vørn hava vit higartil fiska 3.616 tons umframt tað fiska er seinastu 1-2 vikurnar. Veiðan er umleið dupult so nógv sum ICES tilmælir.

MSC tók góðkenningina av toski aftur. Hetta tí at stovnurin er minni enn mett verður burðardygt. Tilmæli tá stovnurin er so lítil er vanliga at vit skulu gevast at fiska. Tá ICES fyri ári síðan segði at vit kunnu veiða 2.206 tons men hava fiskidagar, sum ikki avmarka í tonsum, so heldur ikki hava recovery ætlan so er tað helst orsøkin til at MSC ógildaði góðkenningina.

Havstovan ger yvirlitistrolingar við Jákup Sverra. Seinast var í august. Úrslitið fyri tosk var tað vánaligasta so langt sum aftur sum yvirlitið røkkur. Yvirlitið røkkur bara aftur til 1995.

Í ráðgevingini hjá ICES seinasta ár síggja vit eisini ymisk tøl. Er toskastovnurin minni enn 21.000 tons siga ICES reglurnar at vit eiga at gevast at fiska. Toskastovnurin er sambært ICES 15.240 tons.

Síðan hevur ICES ymiskar útrokningar og m.a. siga teir at stovnurin kann verða 22.000 tons og hann kann verða 10.000 tons. 

Tilgongdin seinastu árini hevur ikki verið góð. Tó er ofta trupult at meta hetta fyrr enn nøkur ár eru farin. Roknast kann við, at sera nógvur fiskur doyði í 2019, sum eisini gevur óvissu.

Í 2008-2010 og frá 1993-1995 var tilráðingin at vit skulu gevast at fiska tosk. 

29 november fáa vit nýggja tilráðing. Helst verður tann tilráðingin at vit skulu gevast at veiða tosk. 

Nú er val og tí verður tað komandi samgonga sum skal taka støðu til veiðu við atliti til MSC góðkenning og ráðgeving frá Havstovuni og ICES.