Hvat er fiskimannafelagið? Og hví rinda vit eitt rímuliga stórt gjald til hetta felagið?

Føroya Fiskimannafelag er til fyri allar limir. Felagið samráðist um ein so góðan sáttmála sum gjørligt fyri allar limir.

Tað er umráðandi, at felagið verjir sínar limir, serliga tá Løgtinsval er. Tá kann sjálvt klókasta valevnið blíva í ørviti.
Til seinasta Løgtingsval var vandi fyri, at fiskimenn í Barentshavinum mistu arbeiðið, tí sáttmálin við russar varð kanska uppsagdur. Russar keypa næstan alla sildina, vit fiska og teir eru í okkara parti, tá vit samráðast um uppsjóvarfisk. Skipini sum liggja her, keypa líka nógv, sum tey larma.

Um sáttmálin varð uppsagdur, so hevði tað rakt fiskimannin meint, men landskassin og kommunukassar høvdu mist fleiri 100 milliónir. Men hetta tordu politikarar ikki at fortelja.

Skattur av hýrum fer partvís í kommukassan. Tilfeingisgjaldið endar alt í landskassanum. Tað, sum fyrr fór í kommunkassar, fer í dag í landskassan. Hægri tilfeingisgjald merkir hægri kommunskatt ella minkandi tænastu í ávísum kommunum.

Tað má átalast, at politikarar, uttan at blunka, taka hýru frá sjómonnum.

Veiða og hýra hjá heimaflotanum eru ov lág. Hetta er tann bólkurin, sum hevur tað truplast, og sum flest øll royna at gloyma.

Fiskimannafelagið eigur at arbeiða fyri, at umstøðurnar gerast betri. Ov nógvar leiðir eru stongdar, og ov lítið verður fiska. Um vit onki gera, so verða hvørki skip, bátar ella fiskimenn um fá ár. Ein sannroynd er, at fiskimenn ikki hava álit á fiskifrøðini.

Samanhald og trivnaður millum fiskimenn er minkandi. Vit eiga at skapa løtur, har vit møtast til ymiskt gevandi fyri limirnir. Føroya Fiskimannafelag eigur at vera virkið á Føroya Sjómannadegi. Felagið kundi havt ein bás, har sjómenn, líka mikið hvønn skipabólk, teir vóru partar av, kunnu møtast til prát.

Ein møguleiki kundi verið, at øll manningarfeløgini høvdu ársaðalfund sama dag. Ímyndi tykkum, um fakfelagsrørslurnar gingu hond í hond í framtíðini.

Tit, ið Eysturoynni, sum eru limir í Fiskimannafelagnum, hava fingið eitt valkort í postkassan. Tit hava nú møguleika at velja eitt nýtt umboð í nevndina í Føroya Fiskimannafelag.

Skal tað vera sama stilla kósin framyvir, ella skal tað verða ein meira virkin felagsskapur.

Tað eru tit limir, sum avgera tað.

Jonhard Danielsen
Valevni til nevndina í Føroya Fiskimannafelag