Av tí kenna vit kærleikan, at Hann gav lív Sítt fyri okkum. 1.Jóh.3.16

Siðvenjan at senda kenslubornar kærleiksgávur Valentin-dag hevur sín uppruna, tá ein heiðin prestur royndi at hjálpa kristnum, ið liðu undir ræðuligum atsóknum. Hann varð tikin og settur fastur. Í tí rómverska fonglinum gjørdist hann kristin og innsiglaði harvið sín dóm. 14. Februar, ár 269 e.K. varð hann tikin av døgum. Tað sigst, at hann sankaði hjartaskapt blákollubløð millum rimarnar í fongslinum, prikkholaði kærleiksboðskapir í tey og sendi tey runt. Í tøkniligu samtíð okkara kann evangeliski boðskapurin spreiðast á ymiskan hátt. Ikki einans ein dag um árið, men dagliga. Hann, ið elskaði okkum í tað óendaliga, “tvingar” (2.Kor.5.14 ) okkum at senda Hansara kærleika runt um í heiminum.

Úrvalt - Páll Poulsen týddi úr enskum

Tín kærleik eingin hugur skilja kann,

mín Gud og Harri, ei eg fati hann!

Tó vil eg, Jesus, fegin grunda á

hans longd og breidd og hædd og dýpd og sjá

hann meir og meir!

2. Eg vildi talað um hann fyri teim,

sum burt vilst eru, sagt við tey: Kom heim!

Tí Jesus fyri teg í deyðan gekk,

av kærleika til tín á krossi hekk –

kom heim, á, kom!

3. Um kærleik tín eg vildi sungið prís

og ært teg, tænt tær á ein betri vís;

tú hevur hjarta mínum givið frið

og sæla vón um dýrd í Himli við –

takk, Harri Krist!

4. Men tó eg, hesum veika holdi í,

ei rætt tær prísi, Jesus, nakra tíð,

mítt tóma ílat fram eg beri tó,

hjá tær jú flýtur lívsins kelda góð –

á, fyll meg nú!

5. Ja, fyll tú meg við kærleika frá tær!

Eg einki størri veit at ynskja mær;

lær meg at drekka av tí kelduni,

sum flýtur út við hvílu fyri meg

hjá tær, hjá tær.

*Mary Shekleton (Írl.), 1827–1883.

{Lag: Ira D. Sankey (Amer.), 1840–1908}.

(V. Danielsen týddi).

Nr.946 í NSGF 2015