Í sambandi við at tollararnir hjá TAKS í gjár kannaðu ein bil, sum skuldi í land av Norrønu, funnu teir 24 kg av hashi. Føroya Politi handtók í hesum sambandi eina kvinnu og ein mann og skuldsetti tey fyri brot á grein 191 í revsilógini, sum snýr seg um smugling av narkotika.

Ákæruvaldið framstillaði fólkini í grundlógaravhoyring í Føroya Rætti í morgun. Fólkini, sum eru donsk, vóru varðhaldsfongslað í fýra vikur.

Talan er um eina ógvuliga stóra einstaka nøgd av hashi við einum søluvirði á upp til 7 mió. kr. Politiið fer komandi tíðina m.a. at kanna, hvør skuldi taka ímóti hashinum í Føroyum.

Brot á grein 191 í revsilógini kann hava við sær fongsul í upp til 10 ár.

Politiið hevur í løtuni ikki fleiri viðmerkingar til málið.