Hóskvøldi 2 januar var eldur og spronging fráboða umborð á RO-RO skipinum Glyvursnes, sum Smyril Line eigur. 

Sløkkiliðið kom á staðið kl. 21.15 føroyska tíð. Eldurin var sløktur kl. 22.20. Aftaná er sjálvandi brandvakt á staðnum, tí vandi er altíð fyri at eldur kyknar uppaftur.

Smyril Line hevur boða frá, í tíðindaskrivi, at 1 persónur er deyður og 2 persónar eru á sjúkrahúsi. Tey avvarðandi hava fingið boð.

Løgreglan í Danmark upplýsti at annar av hesum var álvarsliga skaddur, meðan triðji persónurin bert hevði okkurt smávegis og møguliga roykeitran.

Smyril Line upplýsti at allir vóru Føroyingar.

Sambært Smyril Line, so er manningin flutt av skipinum og fær kreppuhjálp.

Eisini tey avvarðandi fáa tilboð um kreppuhjálp. 

"Hetta er ein syrgiligur dagur hjá øllum okkum í Smyril Line, og okkara tankar eru hjá teimum avvarðandi," skrivar Jens Meinhard Rasmussen, stjóri í Smyril Line, í tíðindaskrivinum.