Í Rættinum hesa vikuna var mál, har Marita Hentze, tekniskur leiðari í Runavíkar kommunu, hevur stevnt Reidar Joensen, vara-býráðslimi í Runavikar kommunu, fyri ærumeiðing. Í grein í januar 2024 skrivaði Reidar Joensen, at Marita Hentze lýgur fyri Løgtingsins umboðsmanni og Kærunevndini í Lendismálum (sum síðan hevur broytt “navn” til Kærustovnurin).

Rættarfundurin byrjaði við framløgu av skjølum. Tað vóru óvanliga nógv skjøl og tók fleiri tímar.

Síðan skuldu vitnir avhoyrast. Fyrst var Marita Hentze. Tað ljóðaði undarligt, tá hon segði, at hon ikki, fyrr enn hon sá svarskrivið, frá Reidar Joensen, gjørdist greið yvir, at tað ikki var byggimál hjá Bakkafrost í Funningsfirði, men byggimálið hjá OCD í Saltangará, sum var grundarlag fyri pástandinum hjá Reidar Joensen.

Vanligt er, at advokatar senda hóttan um stevning fyrst, soleiðis at øll eru greið yvir, hvat talan er um og fyri at sleppa undan at enda í rættinum. Tað kostar lættliga 1-200.000 krónur og ongin kann siga úrslitið frammanundan.

Í hesum føri stevndi advokaturin vegna Maritu Hentze, uttan at vita hvat mál stevndi tosaði um.

Í framløgdu skjølunum, hjá Reidar Joensen, var eisini grein, sum hevði staðið í R7 um OCD málið.

Sakførarin hjá Reidar Joensen, undraðist eisini á, at Reidar var stevndur fyri at skriva tað, sum R7 hevði skriva, meðan R7 ikki er stevnt.

Her enda vit fyrsta part av frágreiðingini um drúgva rættarmálið. Dómur verður sagdur í málinum í februar.