Hagstovan hevur talt gistingar fyri alt 2024 fyri føroysku gistingarhúsini. Tey hava havt fleiri gestir, men selt færri kømur. Tilsamans er tað helst ein lítil framgongd.

Tal av ferðafólki sum eru aðrastaðni enn úr Føroyum og Danmark er økt. Vit nærkast at helvtin av hotelkømurum eru seld teimum sum búgva aðrastaðni enn í Føroyum ella Danmark. Gott 20% av gistingum eru føroyingar. Tað ljóðar av nógvum, havandi í huga, hvussu gott vegasambandi er.

Færri kamarsnætur, men fleri fólkanætur í 2024
Innskrivingarnar á gistingarhúsunum vóru nærum 95.000 tilsamans fyri árið 2024. Hetta eru gott 2.600 innskrivingar fleiri enn í 2023. Í miðal vóru 545 kømur tøk um mánaðin í 2024, har av helvtin av teimum vórðu nýtt.

Fólkanætur telja hvussu nógv fólk gista og hvussu leingi. Um eitt fólk svevur tríggjar nætur, ella um trý fólk sova eina nátt, er talan í báðum førum um tríggjar fólkanætur tilsamans.

Fólkanæturnar vóru góðar 230.400 í 2024, ið eru nærum 8.900 fleiri enn í 2023. Innskrivingarnar vóru 95.000 í tali, ið eru útvið 3% fleiri enn í 2023. 

Nýtslustigið minkað eitt vet 
Rúmføri telur, hvussu nógv kømur eru tøk. Fyri at finna árliga rúmføri hjá einum gistingarhúsi við 20 kømrum, verða hesi faldaði við dagatali í árinum, sum gistingarhúsið hevur opið.

Nýtslustigið telur, hvussu nógv kømur eru brúkt í mun til hvussu nógv eru tøk.

Í fjør vóru 49 prosent av kømrunum á føroysku gistingarhúsunum brúkt. Tað er eitt vet minni enn í 2023, tá talið var 52 prosent. Her skal havast í huga, at talið av tøkum kømrum, ella rúmføri, er vaksið við gott 6.500 kømrum fyri alt árið. Kamarsnæturnar vóru gott 2.650 færri í fjør enn í 2023.

Nýtslustigið av kømrum var størst í 2019, tá ið tað var 61 prosent.