Tað sigur Jenny Lydersen, undirvísingarleiðari í Mentamálaráðnum, sum hevur verið toghaldari á nýggju vegleiðaraútbúgvingini í støddfrøði.

Mentamálaráðið skipað fyri

Tað var seinnapartin í gjár, 20. september, at 30 lærarar fingu prógv, tí tey hava lokið útbúgving sum vegleiðarar í støddfrøði. Talan er um eina diplomútbúgving, sum Mentamálaráðið hevur skipað fyri í samstarvi við danska professiónsútbúgvingarstovnin, UCC.

Nýggju vegleiðararnir starvast sum lærarar í skúlum kring alt landið – flestu teirra í fólkaskúlanum og onkur á miðnámi. Tey skulu framyvir í høvuðsheitum verða vegleiðarar hjá øðrum støddfrøðilærarum og hjá sínum skúlaleiðslum. Tey skulu tó eisini vegleiða viðvíkjandi undirvísing hjá næmingum við serligum avbjóðingum innan støddfrøði.

Mentamálaráðið hevur áður skipað fyri eftirútbúgvingum fyri lærarar innan lesing og innan serøkið, og nú átti støddfrøðin tørn.

Landsstýriskvinnan í Mentamálum, Rigmor Dam, handaði prógvini

Hon vísti í røðu síni á týdningin av, at vit sum einstaklingar menna okkum alt lívið, tí tað er grundarlagið undir at menna og flyta alt samfelagið.

Útbúgvingin hjá støddfrøðivegleiðarunum byrjaði á vári 2014 og endaði við ritgerð undan summarferiuni nú í ár. Útbúgvingin er á tilsamans 60 ects.

Kelda: Tíðindaskriv frá Mentamálaráðnum www.mmr.fo