Uppskotið til fíggjarlóg fyri 2018 er merkt av at tíðirnar eru góðar, og yvirskotið verður tað stórsta í mong ár.

Avlop landskassans verður 408 mió. kr. í 2018, og rakstrarútreiðslurnar vaksa 1,9%. Umleið 2/3 av avlopinum verður brúkt til at gjalda niður skuld, meðan umleið 1/3 verður sett í Búskapargrunn Føroya, skrivar fíggjarmálaráðið á heimasíðu síni.

Inntøkurnar vaksa nógv, men tað leggur eisini trýst á politikarar at geva út á útreiðslusíðuni. Landsstýrið roynir at halda aftur, og hevur fyrr boða frá at rakstrarútreiðslurnar skulu ikki hækka meira enn 1,5% umframt lønarvøkstur. Men har hevur man givið eitt sindur eftir fyri trýstinum, tí í uppskotinum er vøksturin, sum nevnt, 1,9% umframt lønarvøkstur.

Á íløgusíðuni verður ikki hildið aftur. Stóra íløgan er nýggja havrannsóknarskipið men eisini innan almenna bygging verða pengar brúktir.

Góðu tíðirnar hava havt við sær, at fleiri fólk eru flutt til landið. Og tað setur eisini síni krøv, tí nú eru tað sjálvandi fleiri ið skulu hava almennar tænastur. Tað sæst eisini aftur á fíggjarlógini.

Landsstýrið hevur gjørt avtalu við Sjálvstýri. Sambært fíggjarmálaráðnum, so eru samgongan og Sjálvstýrið samd um "at virka fyri størri virksemi og fleiri íløgum kring landið, og partarnir hava tí gjørt semju um fíggjarlógaruppskotið fyri 2018." Hvat tað kemur at merkja er ikki greitt enn, men tað frætta vit meira um seinni.

Eftir øllum at døma hevur Sonja Jógvansdóttir bert fingið part av sínum krøvum við. Tingkvinnan vildi hava at útgjaldið til fyritíðarpensionistar hækkaði 3000 kr. yvir tvey ár, umframt at loftið verður tikið av skattafrádrátturin fyri fakfelagsjald. Í tí fíggjarlógaruppskotið ið fyriliggur, hækkar útgjaldið við 1.000 kr., men broytingin í skattafrádráttinum er ikki við.

Framløgan hjá fíggjarmálaráðharranum kann síggjast her.

Uppskotið til fíggjarlóg kann lesast her.