Skulu toftamenn gera sær vónir um at flyta upp aftur í bestu deildina næsta ár, skulu teir helst vinna dystin í morgin.

Skulu hoyvíkingar verða verandi í næstbestu deildini, skulu teir eisini helst vinna torføra útidystin í morgin.

B68 liggur í løtuni á fjórðaplássi í deildini, eitt stig aftanfyri Víking á triðjaplássi og trý stig aftanfyri KÍ á øðrumplássi.

Hvørki KÍ ella Víkingur kunnu flyta upp, tí tey frammanundan eru umboðað í Effodeildini.

Men skal B68 flyta upp, so krevst, at teir í minsta lagi tryggja sær triðjaplássið.

Hjá GizaHoyvík er støðan tann, at teir í løtuni liggja á einum 7. plássi, eitt stig frammanfyri Suðringar og fimm stig frammanfyri B36, sum liggur undir niðurflytingarstrikuni saman við ÍF, sum langt síðani er flutt niður í 2. deild.

Fáa hoyvíkingar stig ímóti B68, eru teir mestsum tryggjaðir undan niðurflyting, men B36 hevur - á pappírinum - lættari dystir eftir at spæla enn teir, og tí hevði ein sigur helst verið kærkomin hjá teimum í morgin.

Leikumfarið hetta vikuskiftið er tað triðsíðsta í hesum kappingarárinum.

Umframt at ÍF longu er flutt niður, er eisini greitt, at AB sum greitt oddalið í deildini, flytir upp í bestu deildina næsta ár.

Fylgir B68 ikki við teimum, ber hetta í sær, at bert eitt lið flytir niður úr Effodeildini. Har liggur ÍF eisini niðast.

Tryggja toftamenn sær hinvegin uppflyting, flytir eisini 07 Vestur sum næstniðasta liðið niður.

Sostatt hevur endaspurturin hjá B68 nógv at siga fyri bæði uppflytingina í næstbestu deildini og niðurflytingina í bestu deildini.

So nú má røkka ella støkka, er boðskapurin hjá B68-viðhaldsfólkunum.

Dysturin verður á Svangaskarði leygardagin kl. 16.