Adeshina Lawal var arkitekturin fyri tveimum av teimum fimm málunum í stórsigrinum hjá Víkingi í Fløtugerði í Fuglafirði seinnapartin, har botnliðið ÍF noyddist at lúta 1-5 fyri føroyameistarunum.

Harvið fór hann framum Klæmint Olsen úr NSÌ, sum higartil í ár hevur kunnað erpað sær av at vera besti málskjútti í bestu deildini.

Tað skuldu bert ganga fimm minuttir, áðrenn teir 300 áskoðararnir fyrstu ferð sóu nigerianska bóltsnillingin gera vart við seg og harvið leggja fyrstu lunnarnar undir stórsigurin hjá Víkingi.

Tó sluppu vertirnir at javna til 1-1 (9. min.), men Víkingur kom framum aftur 2-1 við sjálvmáli (20. min.).

Hetta var eisini støðan í hálvleikinum.

Eftir níggju minuttum seint í seinna hálvleiki øktu teir ljósabláu leiðsluna við trimum málum.

Fyrst var Adeshina Lawal aftur á blettinum (70. min.) við sínum seinna máli og økti til 3-1, síðani kom Sølvi Vatnhamar á máltalvuna og gjørdi tað til 4-1 (76. min.), áðrenn Hans Pauli Samuelsen (79. min.) endaði málveitsluna við at seta bóltin í netið til endaliga úrslitið 5-1.

Víkingur hevur nú 52 stig á fyrstaplássi og restar bert eitt stig í at endurvinna meistaraheitið. Nr. 2 er B36 við 47 stigum og nr. 3 KÍ við 46 stigum.

Dystirnir, Víkingur hevur eftir at spæla, eru ímóti NSÍ (úti) og EB/Streymi (heima).

Úrslitini av hinum dystunum í 25. leikumfari vóru: KÍ - Suðringar 0-0, Skála - B36 2-3, HB - EB/streymur 2-3 og 07 Vestur - NSÍ 2-3.