Heimskendi listamálarin og elskaði tenorsangarin Ingálvur av Reyni andaðist fyri 12 árum síðani, men hann livir framvegis bæði í málningalistini og í teimum mongu andaligu sálmunum og sangunum, sum hann við síni sermerktu høgu tenorrødd aftur og aftur sang fyri fullsettum hølum bæði í Føroyum, Danmark og í Íslandi, og eisini í Westminster Hall í London, har 2000 fólk hoyrdu hann syngja á enskum máli á heysti í 1970 saman við Ebenezerkórinum.

Ingálvur megnaði við síni kláru og sterku rødd at lyfta sangin og áhoyrararnar upp á tónatindarnar í eina fullkomna eind soleiðis, at teir stóru andaligu sannleikarnir, sum hann sang um, gjørdust sólarklárir.

Sonur Ingálv, Árni av Reyni, hevur, saman við Evangelisku Røddini og øðrum, arbeitt í mong ár at savna sangupptøkur við pápanum, sum vóru egnaðar at geva út á fløgu. Árni sigur, at í fleiri tíggjuár hevur verið hugsað og tosað aftur og fram um innihaldið, men tíðliga í summar fóru 30 sálmar og sangir til framleiðslu, og fyri nøkrum døgum síðani kom ein dupultfløga út við 15 sangum á hvørjari. Tað eru teir báðir, Óli Poulsen og Bárður Háberg, sum hava
talgilda og ljóðviðgjørt gomlu upptøkurnar.

Heiti á fløguhúsanum er: INGÁLVUR AV REYNI – gangi eg um heiðar fjøll og dalar.

Fløguhúsin er prýddur við eini andlitsmynd av Ingálvi, og inni í húsanum er eitt trivaligt heftið, har Árni skrivar um pápan undir heitinum: Ingálvur – í søgu og sjón. Allir 30 sangirnir eru prentaðir í heftinum soleiðis, at ein kann fylgja við í tekstinum, meðan fløgan spælir. Flestu sangtekstirnir í heftinum eru prýddir við listaverkum hjá Ingálvi. Upplagið er upp á 2000 fløgur, og Kristiliga Tíðindasendingin hevur skilt, at stórur keypsáhugi er fyri fløguni.

Fløgurnar eru ein væl egnað jólagáva, og prísurin er 189 krónur fyri báðar fløgurnar.