Tað skrivar NRK á heimasíðu síni og vísir til eitt mál, sum ongan enda tykist at fáa.

Málið snýr seg um landingarmiðstøðina Lofoten Viking AS á Værøy.

Í 2012 meldaði Fiskivinnudirektoratið fyritøkuna fyri at hava fjalt fisk á avreiðingarseðlunum fyri meira enn 18 miljónir norskar krónur.

Veiðan fevndi um árini frá 2009 til 2011.

Løgreglan hevði tó ikki orku til at viðgera málið og gjørdi í 2015 av at leggja tað til viks og ístaðin raðfesta onnur brotsverk sum harðskap, neyðtøkur og narkotika.

Hesa avgerðina kærdi Fiskivinnudirektoratið til ríkisadvokatin.

Hann broytti í 2016 avgerðina hjá løgregluni, og í juni í fjør fekk virkið krav um endurgjald upp á 10 miljónir krónur og 1 miljón krónur í bót.

Góðtók ikki rokningina

Fyritøkan hevur sýtt fyri at rinda peningin, og nú bíðar Fiskivinnudirektoratið so aftur eftir, at málið verður liðugt kannað og lagt fyri rættin.

-At málið ongan enda fær, er sanniliga eisini sera tyngjandi fyri okkum, sigur dagligi leiðarin á Lofoten Viking, Arne Mathisen, við NRK.

– Tað virkar ikki, sum nakar ger nakað. Málið hevur hingið í luftini ár eftir ár. Hetta er ikki rætt, sigur Mathisen, sum avgjørdur vísir aftur, at teir hava gjørt nakað skeivt.

Advokatur hansara, Dag Steinfeld, sigur, at teir vóru til reiðar at møta í rættinum, tá ákærumyndugleikin tók málið aftur í apríl.

– Vit kærdu og vildu hava málið avgreitt. Nú ivist eg í, um nakað mál verður yvirhøvur. Tað er tikið aftur tvær ferðir longu, og ongi ítøkilig prógv eru um svik í hesum málinum, sigur Steinfeld við NRK.

Letur vera við at melda

Fiskivinnudirektoratið viðgongur, at tey eisini eru farin at troyttast av hesum drúgva málinum.

– Í flestu stóru málunum fara vit jú til løgregluna. Høvdu vit ikki gjørt tað, hevði tað verið at undirgrivið skipanina. Men vit hava aðrar revsimøguleikar, so sum at taka loyvi inn aftur. Tá løgreglan ikki hevur orku til at gera sína skyldu á hesum økinum, verða vit noydd til at taka til onnur ráð, sigur Thord Monsen, deildarleiðari í Fiskivinnudirektoratinum, við NRK.

– Tó er umráðandi, at vit og onnur halda fram við at melda hesi málini, tí bert á henda hátt kunnu vit lýsa trupulleikan, sigur hann.

Fiskivinnudirektoratið er í løtuni saman við toll- og skattavaldinum umframt fleiri øðrum viðkomandi myndugleikum í ferð við at leggja síðstu hond á eina frágreiðing um ótolandi viðurskiftini.

Tá hon er liðug, verður frágreiðingin send bæði løgmálaráðnum og fiskimálaráðnum til kunningar.