Sjey persónar tiknir í størsta hassjmálinum nakrantíð í Grønlandi
Sjey persónar, sum 26. juli vórðu handtiknir undir einum umfatandi løgregluátaki í Nuuk, sita framvegis handan rimarnar og skulu vera har jólini og nýggjárið av, skrivar Sermitsiaq.gl
Tey eru øll skuldsett fyri í felag at hava smuglað umleið 15 kilo av hassji til Grønlands.
Málið, ið sigst vera størsta hassjmálið í søgu Grønlands, veksur tó framvegis í vavi, stendur í tíðindaskrivi frá løgregluni.
63 kilo
Seks av teimum sjey fingu á rættarfundi í gjár skuldsetingarnar ímóti sær víðkaðar, so tey nú eru skuldsett fyri at hava smuglað tilsamans 63 kilo av hassji úr Danmark til Grønlands síðani 2015.
- Ein kvinna í 20unum fekk á sama hátt skuldsetingarnar ímóti sær víðkaðar, so hon saman við hinum nú er skuldsett fyri at hava smuglað umleið 14 kilo av hassji síðani 2016, upplýsir ákærin Tobias Berg.
Tey skuldsettu, sum eru í 20 og 30unum, nokta seg øll sekan.
Fleiri onnur skuldsett
Fleiri onnur eru í sambandi við umfatandi kanningarnar eisini vorðin skuldsett, verður nú upplýst. Løgreglan hevur illgruna um, at tey hava samband við málið.
Rættarfundurin í gjár varð hildin fyri læstum hurðum, og tí hevur løgreglan í løtuni ikki fleiri upplýsingar.
Mest lisið í farnu viku
Samband
Heygsvegur 8
490 Strendur