2. viðgerð av uppskotinum um sjófeingi verður í morgin 08.12.2017
Í øðrum føri, ber til at leiga sær skip inn, og koyra ES borgarar umborð fyri “ILO minstuløn”. Her er talan um ein sáttmála, sum er internationalur og ein sáttmáli, sum okkara høga ting góðkent. Við hesum fáa vit sosiala dumping inná okkum, og hesir umleið 300 føroyingarnir/familjurnar enda í ALS ella forsorg.
Í morgin, fríggjadagin 8. desember, verður 2. viðgerð av uppskotinum hjá samgonguni um sjófeingi. Tað eru ikki smávegis broytingar, sum lagt verður upp til í uppskotinum um nýggja fiskivinnuskipan.
Tað eru nógv viðurskifti, ið vit hava havt viðmerkingar til í Vinnunevndini; og tað eru nógv ræðandi punkt í uppskotinum. Eitt av teimum er avtøkan av veiðuloyvum, og hvørjar avleiðingar tað hevur við sær, tá veiðuloyvini verða loyst frá stálinum.
Sum dømi kundi verið nevnt, at við uppskotinum hjá samgonguni er onki til hindurs fyri at skipini, sum higartil hava fiska í Barentshavinum (Enniberg, Gadus, Sjúrðarberg og Akraberg) vera sett inn í fiskiskapin undir Føroyum. Verður tað gjørt so megna hesi skip at fiska meginpartin av botnfiskinum, sum fiskaður verður undir Føroyum í einum fiskiári.
Og vit spyrja: Eru vit veruliga so langt úti, at tað er ein slík skipan vit ynskja?
Niðanfyri er eitt dømi, sum helst fá samgongufólk hava hugsað um:
UPPSJÓARSKIP OG BARENTSHAVSFLOTIN KOMA AT FISKA BOTNFISK
Um vit ímynda okkum, at ein reiðari, sum eigur 1 - 2 -3 ella 4 pør av partrolarum, sum fiska botnfisk undir Føroyum. Og hann eigur eisini eitt ella tvey uppsjóarskip, ja tað verður lag á manni at vera kreativur, tí nú er einki krav um veiðiloyvi, men bert hóskandi skip. Tað eru sjálvandi ávís bústaðarviðurskifti, sum skula vera uppá pláss, hjá rættindahavaranum, so eigarin/reiðarin kann leggja ella selja øll pørini, og brúka uppsjóarskipini ella Barentshavsskipini til at fiska botnfiskakvotua undir Føroyum.
Eg havi hugt uppá, hvussu nógv arbeiðspláss/ársverk fara fyri bakka. Her tosa vit um eini 27 - 30 skip við dupultari manning. So talan er um, at umleið 300 ársverk, ella 300 familjumenn, verða tiknir burtur úr fiskivinnuni.
Og landsstýrismaðurin tosar um betri “atkomuligheit”, eg spyrji bara, betri “atkomuligheit” fyri hvønn?
LEIGUSKIP
Í øðrum føri, ber til at leiga sær skip inn, og koyra ES borgarar umborð fyri “ILO minstuløn”. Her er talan um ein sáttmála, sum er internationalur og ein sáttmáli, sum okkara høga ting góðkent. Við hesum fáa vit sosiala dumping inná okkum, og hesir umleið 300 føroyingarnir/familjurnar enda í ALS ella forsorg.
Tað má sigast at vera ófatuligt skelkandi at vera vitni til.
Vónandi verður uppskotið beint aftur í Vinnunevndina, har tað kann fáa eina nýggja viðgerð soleiðis, at tað - borðbært – kann samtykkjast av løgtinginum.
Vegna
Føroya Skipara- & Navigatørfelag
Annfinnur Garðalíð
Formaður
Mest lisið í farnu viku
Samband
Heygsvegur 8
490 Strendur