Samgongan missir meirilutan
Javnaðarflokkurin verður stóri taparin.
Ein nýggj veljarakanning, sum Gallup hevur gjørt fyri Kringvarpið og Miðlahúsið vísir, at Javnaðarflokkurin hevði verið stóri taparin, um val hevði verið í dag. Javnaðarflokkurin fær sambært kanningini 20,9 prosent av atkvøðunum, sum er ein afturgongd á 4,2 prosentstig í mun til seinasta løgtingsval. Hetta gevur flokkinum 7 tingsessir (ein minni enn á valinum).
Hin stóri samgonguflokkurin, Tjóðveldi, missir 0,4 prosentstig sambært kanningini, men hann varðveitir sínar 7 tingsessir.
Miðflokkurin hevur eisini eina lítla afturgongd (0,2 prosentstig), men tað broytir ikki tingmannatalið.
Fólkaflokkurin stendur til at fáa størstu framgongdina, sambært kanningini. Flokkurin fær 21,4 prosent av atkvøðunum, sum er ein framgongd á 2,5 prosentstig síðani valið, og tað gevur flokkinum ein tingsess afturat teimum 6, sum flokkurin hevur.
Sambandsflokkurin fær í kanningini 20,6 prosent, sum er ein framgongd á 1,9 prosentstig. Tað gevur flokkinum ein tingsess afturat teimum 6, sum flokkurin hevur.
Framsókn hevur eina lítla framgongd á 0,4 prosentstig. Flokkurn fær 7,3 prosent av atkvøunum og tað broytir ikki tingmannatalið.
Sjálvstýri hevur eina lítla framgongd og fer úr 4,0 uppí 4,2 prosent av atkvøðunum, men hóast hetta, so missir flokkurin annað umboðið í løgtinginum. Tað hongur saman við, at á seinasta vali vóru tað sera smáir marginalar, sum tryggjaðu flokkinum seinna umboðið.
Úrslitið í veljarakanningini gevur somu ábending sum kanningin, ið Fynd gjørdi fyri Norðlýsið í farna mánaði, tó eru broytingarnar ikki líka stórar í hesi kanningini.
Mest lisið í farnu viku
Samband
Heygsvegur 8
490 Strendur