Hetta verður ikki hissini rættarmál. Bara løgfrøðingarnir og sakarmálini næstu nógvu árini fara at kosta milliardir av dollarum. Í USA eru rættarmál hundadýr.

Frisco og Oakland liggja í California út móti Kyrrahavinum, og býirnir hava saman stevnt nøkur av heimsins størstu oljufeløgum. Tey eru BP, Royal Dutch, Exxon Mobil, Chevron og ConocoPhillips, sum brynja seg til verju.

Orsøkin til ákærurnar eru, at býirnir hava havt eyka útreiðslur til bakka- og brimverjur fram við strondini móti Kyrrahavi. Nakað sum føroysk brimpláss.

Býarstýrini skuldseta oljufeløgini fyri at hava tjent milliardir av at villleiða fólk og myndugleikar. Kolvetni og CO2-útlát hava økt lofthitan, so tað fløðir hægri enn vant í California. Strondin er máað burtur í støðum, og mannaættin hótt!

California er nú tann statur í USA, sum farnu 30 ár hevur havt vinstrahall stýri á øllum stigum. Guvernørar (“Arnold” undantikin), statskongressir, føderalir senatorar, umboðsfólk, býráð og flestu valdu embætisfólk eru Democrats.

California hevur harðastu umhvørviskrøv, lægstu almennu tænastur, hægst statsskattatrýst, 1/4 av almannaklientunum í USA, 1/3 av latínamerikanskum innbrótarum, størst mun millum rík og fátæk, sum tó øll atkvøða sosialistiskt.

Kommunukassarnir og kaliforniski statskassin hava tað ikki gott, og sakarmál móti oljurisunum kundu fløva óført í teim lagghøllu almennu køssunum.

Saksøkjararnir vóna, at rættarmálið móti oljugigantunum kann enda, sum tá fleiri deilstatir fyri 25 árum síðan stevndu tubbaksfeløgunum í USA og vunnu miljardir av dollarum, sum tær hovríku fyritøkurnar gingu við til at gjalda.

Dómstólar í normalum Vestanlondum høvdu ripað svakligar umhvørvistar sum Frisco og Oakland á dyr og dømt teir at gjalda sakarkostnaðin.

Men í USA verða undirdómarar fólkavaldir, og tí eru teir líka gagg vinstrahallir sum myndugleikarnir í California. Besti uggi hjá teim saksøktu er tí, at Hægstirættur í USA nú hevur konservativan meiriluta.